Mizoram football-in thlenna chin zauh zel

National Sub-Junior Championship for Girls-ah Mizoramin final-ah Haryana 3-0 a hnehin an champion. Pathianni zan khan Barabati Stadium, Odisha-ah final khelh a ni a, Mizoram tan Elizabeth Vanlalmawii'n goal hnih a khung bakah B. Vanlalhriattiri goal khat a khung ve bawk.

India rama football inelnaah Mizoram mipa football teamin sub junior, junior bakah senior team inelna Santosh Trophy-ah champion nomawi an chawi tawh a, National Games-ah gold medal an lak tawh bakah Aizawl FC chu season thara I League khel turin an inpet tling bawk.

Hetihlai hian hmeichhe football team-in sulhnu ṭha an la hnutchhiah lo a, Sub Junior Championship-ah tun hmain final an la thleng ngai lo. Tun ṭumah erawh Mizoram team an che ṭha fal lawr lak a, champion turin goal 42 an khung a, goal hnih chauh an chhuah.

Final-ah Mizoramin inkhel thunun chungin first half-ah goal khat chiah an khung a, Elizabeth-i'n minute 30-naah vei lam

aṭanga Haryana player pathum bumin goal ropui a khung a, minute 65-naah Elizabeth-i hian ama puala goal hnihna a thun a, hemi hma minute ngaah captain Hriattiri'n goal khat a khung ve bawk. Second half goal hnih hi team goal a ni a, coach sawi danin practice-naa an zir dana an khung ve ve a ni.

Final-a Mizoram tana goal hnih khungtu Farkawn tleirawl Elizabeth-i hian inelna neih zawh takah goal 12 khungin, goal khung tam ber a ni.

Mizoram team hian nimin khan Odhisa an chhuahsan a, ruahhman dan chuan Inrinni khian Mizoram an rawn thleng ang.

Mizoram manager Lalnun­sanga (Anuna) chuan, "Final chu kan khel ṭha a ni. Game plan angin ṭum hnih kan score a, a ropui kan ti khawp mai. Kan vanneihna chu zana kan khel kha a ni a, khaw lum lutuk vanga harsatna kan neih loh avangin a tir aṭangin kan nawr thei a ni. Min ṭantute tam hran lo mah se hmun khatah an ṭhu khawm a, an ṭawngṭai rual a, Lalpa chu fakin awm rawh se an ti rual ṭhup ṭhup a, an chungah kan lawm takzet a ni," tiin a sawi.

Mizoram coach Betsy Lal­hlim­puii chuan, "Kan squad kan thlir a, naupang damlo kan nei bawk nen kan hriselna ngaihtuah chuan kan khel ṭha khawpin ka hria. Odhisa Mizo awmte an fel em em a, kawng engkimah min pui a, an chungah kan lawm takzet a ni. Sawi hmaih theih loh chu a hun tea rah ṭhin Pathian kan nei a, Amah vanga tun dinhmun thleng thei kan ni," tiin a sawi.