Chelsea-in Premier League nomawi an chawi ta

Premier League champion Chelsea-in an match hnuhnung berah Sunderland 3-1 in an hneh a, Pathianni zan khan Stamford Bridge-ah nomawi an chawi.

Sunderland-in Chelsea an hmachhawn hmain Arsenal an draw vangin Premier League khel zel turin an him a, hahdam takin English champion an hmachhawn. Minute 26-naah Steven Fletcher hmangin Blackcats-in hmahruai mah se minute 37-naa subsitute Diego Costa penalty hmangin Chelsea in an sut a, second half-ah Juan Cuadrado thlaktu Loic Remy-a'n goal hnih khungin Chelsea 3-1 in an chak.

Jose Mourinho team hian Premier League record thar siamin ni 274 chhung hmahruaitu an ni a, captain John Terry chu Manchester United defender Gary Pallister hnua minute zawng zawng khel vek chunga nomawi chawi thei hmasa ber a ni.

Chelsea match hnuhnung berah hian Petr Cech pawhin staring eleven a chang a, Czech keeper hian season tharah a khelh phakna tur club zawm turin Chelsea a chhuahsan ang.

Drogba an chawimawi

Didier Drogba chuan match hnuhnung ber khelh hmain Chelsea a chhuahsan tur thu a puang a, a game hnuhnung berah chawimawi a ni. Ivorian forward hian captain armband hreng chungin inkhel bul a rawn ṭan a, inhliam vangin minute 30-naah Costa-a'n a rawn thlak.

Chelsea player-te'n Drogba hi an zawn chhuak a, mipuiin zahna lantir nan ding chunga kut beng chungin an veteran forward hi an thlah.

Chelsea tan match 381 khel a, goal 164 khungtu Drogba chuan, "Season khat chhung mumal taka khelh ka la duh a, ka khelh phakna tura luh a ṭul a ni. Fan-te'n Chelsea ka hmangaih zia an hria a, he club-ah hian hna dang chelh tura rawn luh leh theih ngei ka inbeisei," tiin a sawi.

Mourinho thukhawchang

Portuguese manager Jose Mourinho-a'n nomawi chawi zanah a mizia hloh lo a, Drogba an lak chhuah lai aṭanga nomawi chawi thlengin 'The Special One' a ni tih a chetziain a lantir.

Chelsea manager Jose Mourinho chuan, "Kan neih tur ang chu kan nei vekin ka hria. Kan khelh dan hi sawisel a thiang em? An sawisel thei ngei a, mah se thu dik lo an sawi dawn tihna a ni. Khelh dan phung bik kan nei a, team kan phur tlang a, mumal takin kan inrem a, a ṭul chiah kan zir bawk. Kan team hi kan ṭha tluan tling a, chuvanga champion chu kan ni," tiin a sawi.