Rafael Nadal-a tennis zinkawng a tawp ta

Tennis player ropui berte zinga mi, clay court bikah phei chuan ropui fal ber Rafael Nadal chuan tennis a mangṭha fel ta. Mittui nen a hun hnuhnung a hmang a, a hmangaih tennis chu a thlah a ngai ve ta a ni.

Spanish star hian Thawhlehni zan khan an ram tan Davis Cup a khel a, singles match khelin Netherlands mi Botic van de Zandschulp lakah 6-4, 6-4 in a chak lo a, professional match a khelh hnuhnung ber a ni nghal.

Nadal-a'n Davis Cup hi tournament a khelh hnuhnung ber tur a ni tih a lo sawi tawh a, an ram hian Dutch team an hneh loh avangin an zinkawng a tawp. Singles match dangah Carlos Alcaraz chu chak mah se, doubles lamah Alcaraz leh Marcel Granollers te ṭangdun an chak loh avangin an tlang thei ta lo.

Hun tawpna chu

A vanglai chuan sakeibaknei ang maia chak leh kawlhrawng a ni a, amah dang theitu an awm ngai lo. Hlawhtlinna hrang hrang a chang hnem hle a, mahse a hun tawp lamah erawh hliam vangin a buai nasa hle a ni.

Hun tawp hmang turin Malaga, Italy a pan a, ram leh ram mipa tennis team hmanga inelna Davis Cup hi inelna ngaihhlut tak ni mah se ngaihven a hlawh tawk lo ṭhin, kumin erawh chu Nadal hun hnuhnung a nih avangin ngaihventu an tam.

Kum 38 mi Nadal chuan, "Tennis zinkawng thui tak a ni, kum 20 chhung tehmeuh mai ka chamchilh tawh professional career chu ka mangṭha a lo hun ta. Hliamna leh lawmna mai bakah lungngaihna min thlentu chu a lo ni.

"Spain hian Davis Cup ka khelh leh theihna turin kawng min hawnsak a, kan duhthusam ang thlapin thil thleng lo mah se la, ka tana hun min pek hi a hluin ka theihnghilh thei tawh ngai lo ang.

"A nihna takah chuan tun ang hun tawn hi chu tumahin an duh lo ang, infiammi tan phei chuan hun nuam lo leh hrehawm a ni bawk. Chutihrualin, hreh hle mah ila ka taksain a tlin tawh lo tih hi ka pawm a ngai," tiin a sawi.

An thlah e

Palacio de Deportes Arena-ah mipui 11,500 an pungkhawm a, ṭhutna awl a awm lo. Inkhel entute chu "Rafa, Rafa, Rafa" tiin an au rual dual dual a, chak lo zawk ni mah se mipui ngaihven leh an rilru awmna chu Nadal a ni chiang hle.

Nadal hi a nupui Mery leh fapa Rafael Junior te bakah a nu leh pa Ana Maria leh Sebastian te mai bakah a unaunu Maribel chuan a hmunah an ṭawiawm a, amah ṭawiawmtute chuan 'Raging Bull' tih chuanna T-Shirt an ha, hei hi tun hma aṭanga Nadal chhinchhiahna pakhat a ni.

Inkhelh banah Nadal hian inthlahna thu a sawi a, thu a sawi dawn hian light ṭhenkhat chu tih thim niin player-ten an din hual. A hmuna entute hnuk a ulh a, hlawhtling taka tennis a khelh aṭangin an lawmpui tih an lantir bawk.

Nadal tennis zinkawng chu video hmanga tarlan niin, a hnuah Roger Federer, Novak Djokovic, Serena Williams leh Andy Murray te bakah David Beckham, Andres Iniesta, Raul leh golfer Sergio Garcia ten thlahna thu an sawi lai chu tarlan a ni.

Thlahna hun hman a nih hnuah Nadal hian zawimuangin tennis court a chhuahsan a, a hmuna entu mipuite chuan ding chungin zahna chibai an buk a, a ropuina nen Nadal chuan inkhelhna tual zawl chu a mangṭha fel ta, a sulhnu erawh hriatreng a ni tawh ang.