Nadal tana Federer kam chhuak

Roger Federer ropuizia inhrilh nawn a ngai lo a, a ropuina belhchhahtu chu Rafael Nadal a ni - tennis player pahnihte hi an kum inzat chiah lo mah se vanglai an hmang dun a, tuma thik leh tihbuai phak lohin inelna hmuhnawm leh ropui bik chu an chhawp chhuak a ni.

Kum 43 mi Federer chuan, "Rafa chungchang sawi ngei hi ka duh a, mahse ka sawi hma aṭangin ka hnuk a ulh nghal ringawt zel. A bul ṭan nan chuan min hneh ngun lutuk, tiin ka sawi hmasa phawt ang, hei chu thu dik a ni chiang hle.

"Kan intawn tawhna hoah ka hneh aiin min hneh a tam zawk a, player ṭha leh zual zawk ka nih theih nan kawng engkima min cho chhuaktu pawimawh a ni. Training hautak zawk ka neih phah a, chawl hma miah loin ngaihtuahna ka sen a ngai ṭhin bawk.

"Clay court-ah bik ngat phei chuan sawisel boin a khel emawni tih mai tur a ni a, inringtawk leh thatho taka ka chhuah ve pawh hian Rafa bawk hi a chungnung leh ṭhin, min cho phurna leh min nawr kalna hi midang nena khaikhin chi a ni lo," a ti.

Federer leh Nadal te hi vawi 40 an inkhel a, heng zinga ṭum 24-ah Nadal a chak - an intawn zingah Wimbledon 2008 final hmuhnawm leh ropui kha a tel a, tennis match ropui bik an sawi chuan he inkhel hi sawi hmaih theih a ni tawh ngai lo ang.

Swiss legend Federer chuan sawi zawmin, "Kan intawn hmasa ber te kha ka la hre reng, a nihna takah chuan khatih hunlai khan khawvela ṭha bera ngaih kha ka ni ve a, mahse Rafa nen kan inkhelh hnu kha chuan ka tan hna a hautak dan tur ka chhut thiam nghal vek.

"Spain ram tan chuan Rafa an nei hi inchhuanna tur a ni a, ani hian khawvel pumah tennis chu ropui takin a chawisang a, a tilarin miten kan infiamna hi an ngaihven phah nasa hle bawk a ni," tiin a sawi.