GIG Motors Inter Village Football : Team pakuain round of 32 luh belh

GIG Motors All Mizoram Inter Village Football Championship round of 64 chu nimin khan khelh chhunzawm a ni a, goal a lut hnem hle - Armed Vengin a thiam 32 zinga tel turin Leitan Ramthar chu 6-2 in an sawp a, RG Stadium-a inkhelah harsatna an tawk lo.

Armed Veng South tan Ramhlun Venglai laka chak turin harsatna a awm lo a, 5-1 ngawtin an sawp. AVS tan Lalrammuanpuia chuan goal hnih a khung a, goal khungpui mamawh lo mah se RVL player Lalhmangaiha'n an lamah a tilut bawk.

Ramhlun North-in Sairang Jt. VC chu 4-2 in an hneh a, Ramhlun North tan Lalnunsanga'n hattrick a siam. Mamit Jt. VC tan New Serchhip hneh turin harsatna a awm lo a, Lalbiakhlua leh C. Laldinliana ten goal hnih ve ve ang khung a, 7-0 ngawtin an khingpui hi an sawp.

First round an 'bye' hnuah Lungdai pawh inlanin, Dawrpui Vengthar chu 4-1 in an sawp a, Melbuk pawhin mikhual tlangnel zia chhuahin, Saikhamakawn chu 5-1 in an sawp.

Nimin inkhela goal luh hnem bernaah Sihphir Venghlun chuan 12-1 ngawtin West Phaileng an sawp! Sihphir Venghlun tan Lalfamkima'n goal sarih ngawt a khung a, PC Lalruatfela leh Lalrintluanga ten goal hnih ve ve khungin, Lalfakzuala'n goal khat a thawh ve bawk.

College Vengin Ramhlun Sports Complex chu 6-0 ngawtin an sawp a, Republic-in Falkawn laka chak turin vanneihna an mamawh thung. Chite Veng khelmuala inkhelah Ramdintluanga'n Falkawn tan goal a khung hmasa zawk a, Republic hian Lalruatsanga hmangin si phurh an sut.

Goal dang a lut zui lo reng a, team pahnih hi penalty shootout hmangin an inhmachhawn mai dawn niin a lang hman. Mahse, hun pek belh minute thumnaah, Republic tan Lalnunzira'n chakna goal a khung a, 2-1 in an tlang.