Genoa coach thar Vieira

Arsenal legend Patrick Vieira chuan club thar a nei ve leh ta a, Serie A club Genoa a enkawl dawn - Thawhlehni khan Genoa hian an coach ni lai Alberto Gilardino an ban a, a hmun ruak luah turin French coach hi an la lut nghal a ni.

He thu buatsaih a nih lai hian Genoa hian Vieira contract rei zawng an la tarlang lo a, kum 48 mi coach hian club training session a kaihhruai phawt hnuah a contract rei zawng hi an tarlang dawn niin an sawi.

Genoa hi Serie A-ah 17-na an ni mek a, relegation zone an hlatna hi point khat chauh a ni - league match 12 an khelh tawh aṭangin point 10 chauh an la hmu a, December 2022 aṭanga an coach ni tawh Gilardino-a'n a tawrh phah.

Player a nih laia Italy tan vawi 57 inlana goal 19 khungtu Gilardino hian Genoa hi a enkawl aṭanga thla rukna lekah Serie A kaipuiin, season hmasa khan 11-naah season a kharpui bawk a, hna a thawk ṭha hle.

Mahse, beiseina sang tak nena season an thlir laiin beisei ang result an nei thei lo a, kum 42 mi coach hi ban a ni ta. Amah thlaktu Vieira hian Ligue 1 club Strasbourg chu club a enkawl hnuhnung ber niin, July 2023-a a zawm ve chauh club hi June thla khan inhriatthiam tawnnain a chhuahsan.

Player a nih laia France tana vawi 107 inlan thei Vieira hi coach a nih hnuah player a nih lai angin a hlawhtling tawk lo. Major League Soccer club New York City FC aṭanga bul ṭanin, Ligue 1 club Nice, Premier League club Crystal Palace leh Strasbourg a lo enkawl tawh a, nomawi sawi tur a la nei lo.

New York club-ah kum hnih leh a chanve hun hmangin, Nice-ah heti zat kum tho hun a hmang a, kum 2021 khan Palace coach ni tura lakluh ni mah se, March 2023 khan ban a ni - hetihlai hian relegation zone an hlatna chu point thum chauh a ni.