India aiawh tur Lalrina Renthlei

Asian Men and Women 10 Ball Championship 2024-ah Lalrina Renthlei chu India aiawh tura thlan a ni.

Asian 10 Ball Pool Championship 2024 hi Doha khawpui Qatar-ah December 15 - 19 chhung hian neih a ni dawn a. Mipa bik hi December 18-ah zawh a ni ang.

India aiawh tura Lalrina Renthlei thlan a nih thu hi Thawhlahni zan khan Billiards & Snooker Federation of India (BSFI) Secretary General Sunil Bajaj chuan Mizoram Snooker & Billiards Association (MSBA) a rawn hriattir a ni.

Lalrina Renthlei hi pool leh snooker-ah Mizoram number 1 a lo ni fo tawh a, national championship hrang hrangah Mizoram ai a lo awh fo tawh bakah, kumin June khan Maldives Open 2024 - 10 Ball Pool Championship-ah India aiawhin a lo inlan tawh. August khan JOY Heyball International Open Thailand Stop 2024-ah a lo inlan tawh bawk a ni.