Hungary-in Germany an chelh ding

Pathianni zan UEFA Nations League inkhelah Hungary chuan 1-1 in Germany an chelh - mualneitu Hungary hi 1-0 in an hnufual reng a, hun pek belh minute kuanaah penalty an hmu.

Inkhel boruak sangah a pet turin Dominik Szoboszlai a lo pen chhuak a, Liverpool midfielder hian panenka hmanga petin, German keeper Alexander Nubel chu a pet khum a, 1-1 in inkhel an ṭin.

Mahse, he inkhel result hian Germany tan danglamna a thlen tawh lo - Hungary an hmachhawn hma hian quarterfinal an lut chiang tawh a, group hmahruaitu an ni chiang tawh bawk.

Inkhel chu

Puskas Arena-a inkhelah Germany coach Julian Nagelsmann-a'n an dinhmun a chiang tawh tih hriain player pakua ngawt a siksawi a, hetiang boruak karah hian Hungary-in inkhel an thunun zawk - an vanneih zan ni se, chak thei an ni.

Hungary tan hian Andras Schafer, Zsolt Nagy leh Barnabas Varga ten chance duhawm an nei vek a, mahse, Germany tana si ban nghaktu, VfB Stuttgart goalkeeper Alexander Nubel chuan a dansak vek!

Minute 62-naah bench aṭanga Kai Havertz lutin, Arsenal forward hian Germany tan danglamna a thlen nghal teuh hle. Mahse, a shot chuan post perin, 0-0 a nih chhunzawm a, team pahnihin goal an khung dawn lo em ni chu aw, tih mai tur a ni.

A tawpah chuan...

Minute 76-na a ni a, Germany lamin goal an khung ta nge nge - Nico Schlotterbeck-a 'shot' chu Denes Dibusz chuan dangin a per lehlam hi Felix Nmecha ke bulah a tla - Borussia Dortmund midfielder hian ram tana a goal hmasa ber ni turin a khung zui.

Germany-in chakin Nations League group stage-a an match hnuhnung ber khar an duh a, an duh ang hian a thleng ngei dawn ni pawhin a lang. Mahse, hun pek belhah Mihaly Kata-a 'shot' chu German player Robin Koch chuan a kutin a lo dang.

Video assistant referee a inrawlh a, inkhel enkawltu Duje Strukan-a'n mual sira monitor-a a en hnuah penalty spot a kawk - Szoboszlai-a'n inringtawk takin goal-ah a chantir a, 1-1 in inkhel an ṭin.

An dinhmun

Germany-in Nations League match ruk an khelhah tlawm an nei lo. Match liah hnehna an chang a, match hnihah an khingpui an inhnehtawkpui - goal 18 ngawt an khung a, an lamah goal li chiah a lut.

Julian Nagelsmann-a enkawl Germany hi League A group 3-ah hmahruaitu ni chungin quarterfinal an lut a, pahnihna hi Netherlands an ni - anni pawh hian quarterfinal an lut ve bawk.

Hungary-in pathumna ni chungin group stage an khar a, season thara League A khelh chhunzawm turin relegation playoff an khelh a ṭul dawn - Bosnia-Herzegovina chuan table mawngphah luahin, season tharah chuan League B an khel ang.

2026 thlirin

Germany hian kum 2024-ah match 15 khelin, vawi 10 hnehna an chang a, vawi li draw neiin, vawi khat an tlawm - an tlawm awmchhun erawh a pawi lehzual a, Euro quarterfinal-a 2-1 a Spain an ngam loh kha a ni.

Nagelsmann chuan, "Euro sawi tel loh chuan kum 2024 kan hman danah ka lawm hle. He hmuna kan thawhhona ṭha ang hi hmun dangah ka la tawng ngai lo a, team pawhin nasa takin hma kan sawn a ni.

"Kum 2024 a lo thlen meuh chuan 2024 aiin kan inpeih lehzual tawh ang," a ti a, German coach hian USA, Mexico leh Canada ten an inthlen ṭawm tur World Cup 2026 chu a thlir lawk der tawh.