Cavs chak tluang titawptu Celtics

NBA season kal laiah Cleveland Cavaliers chu dan theih loh ang maiin an kal a, mahse a zawna match 15 an chak tluan hnuah ngam loh an tawng. Nimin zing NBA Cup inkhelah Cavs hi Boston Celtics lakah 120-117 in an tlawm.

Cavaliers hian an match hnuhnung zawkah Charlotte Hornets an hneh a, basketball inelna lian leh ngaihhlut berah hian a zawna vawi 15 chak tling thei team pangana an ni chiah, amaherawhchu an record duhawm hi an chhawm nung thei ta lo.

Celtics player an khel ṭha rual em em a, mi paruk ngawtin point 10 a nei tling vek. Jayson Tatum-a'n tha thawh hlawk lehin point 33 a neih bakah rebound vawi 12 a la, a ṭhiante basket neih tur ṭum sarih a siamsak bawk.

Bul an ṭan fuh em avangin Celtics hian chawlhlawk hman laiin point 17 ngawtin hma an hruai fal thei a, quarter hnuhnung pahnihah Cleveland hi chungnung ve ve mah se, hnehna chang let tura an point mamawh zat an sual chhuak zo tawh lo.

Celtics guard Derrick White chuan, "Kan khingpuite kha hneh lo nei loa kaltluang an ni tih kan hria a, an inringtawk em em bawk. Tihsual neih an hlau lo a, an hmaa tih tur awm kha an zuam em em vek emawni tih mai tur niin ka hria.

"NBA Cup a ni a, inkhel a pawimawh. Cavs ang bawk khan chak duh kan ni a, inkhel inhnehtawk leh hautak takah kan dingchang ta zawk, kan result en chuan a awlsam lohzia a lang chiang bawk," tiin a sawi.

Inkhel dangah Los Angeles Lakers an chak, a zawna vawi ruk an chakna ni turin Utah Jazz chu 124-118 in an hneh. Lakers tan hian Dalton Knecht chuan point 37 a nei a, basketball inelna lianah point a neih tam ber ṭum a tawng.

Denver Nuggets pawhin Memphis Grizzlies 122-110 in an hneh a, team ṭha Dallas Mavericks pawhin New Orleans Pelicans chu 132-91 in an sawp bawk.