Gyokeres a vul zel

Sporting Lisbon striker Viktor Gyokeres chuan amah ittute chil a tiput zel - Thawhlehni zan khan international football-ah Sweden tan inlanin, goal li a khung a, Azerbaijan chu 6-0 ngawtin an sawp.

Sweden tan Tottenham Hotspur forward Dejan Kulusevski chuan goal hnih a khung bawk a, Newcastle United striker Alexander Isak chuan penalty khungna chance a neih a hlah thung - khung ngat se Nations League record siam an ni mai tur!

Kar hmasa lawk khan Germany chuan Bosnia & Herzegovina chu 7-0 ngawtin an sawp a, Nations League-a chak chiang ber record an siam - he record nih rual theihna chance hi Sweden-in an nei a, mahse, an bawhpelh.

Sweden hi Nations League Group C1-ah pakhatna an ni a, season tharah chuan League B an khel tawh ang. A tawpa sawi hlawh ber erawh Gyokeres a ni a, kum 26 mi striker hian ram tan match 26-ah goal 15 a khung tling ta der.

Tun season-ah Sporting tan inelna hrang hrangah match 18 khelin goal 23 a khung tawh a, season hmasa khan match 50-ah goal 43 a khung bawk. Striker ṭha mamawh Manchester United fan-ten an hnena khel turin an duh khawp ang - an coach thar hi Lisbon-a Swede striker chher hriamtu Ruben Amorim a ni tih theihnghilh lo la.