A tawp nan Dzeko inlan

Bosnia & Herzegovina captain Edin Dzeko chuan ram tana a match hnuhnung ber a khel a, Thawhlehni zan khan Netherlands nen UEFA Nations League-ah 1-1 in an inhnehtawk.

Germany-in 7-0 ngawta an sawp hlim Bosnia & Herzegovina lakah Netherlands coach Ronald Koeman-a'n player langsar lo zawkte a luhtir a, an chak zo lo.

Netherlands tan Brian Brobbey chuan goal hmahruai khungin, Bosnia hian Ermedin Demirovic hmangin an sut a, goal dang a lut tawh lo.

Fenerbahce striker Dzeko-a'n ram tana a match hnuhnung berah goal khungna chance a nei a, mahse, international match-a a inlan hnuhnung berah a vannei thei tlat lo.

Hetihrual hian si phurh sutna goal pawh a thawhchhuah a ni a, a shot ṭha tak chu Dutch goalkeeper Mark Flekken chuan lo dangin, a per lehlam chu Demirovic chuan goal-ah a chantir a ni.

Kum 38 mi Dzeko hian ram tan match 139 khelin goal 67 ngawt a khung a, assist vawi 29 a nei bawk. Striker tlo ber pawl leh a phu anga fak hlawh lo Dzeko hian tun season-ah Fenerbahce tan match 19 khelin goal 11 a khung leh der tawh a, assist vawi thum a nei bawk.