Premier League khel tur Norwich City

Championship play-off final hi Premier League khel tur zawnna a ni a, a chak zawk dawn theih tura chhut hi pound maktaduai 120 a nih avangin ngaihhlut a hlawh hle.

Thawhṭanni zan khan Wembley Stadium-ah Cameron Jerome leh Nathan Redmond te goal hmangin Norwich City-in Middlesbrough an hneh a, season tharah Premier League an khel dawn.

Playoff chu

Premier League hnuai chiaha league hi Cham­pionship a ni a, champion leh pahnihna te chu Pre­mier League khel turin an tling. Tun season-ah Bournemouth an champion a, pahnihna chu Watford an ni.

Palina aṭanga paruknain playoff an khel a, pathumna dinhmun luahtu Norwich-in paruknaa awm Ipswich hnehin final an lut a; palinaa awm Middlesbrough-in pangna Brentford hnehin final an lut ve bawk.

Final chu

Ṭan aṭanga minute 12-na lekah Boro defender Daniel Ayala tih sual chu Norwich forward Jerome-a'n hmang ṭangkaiin goal-ah a chantir a, minute thum hnuah kum 21-a upa Redmond-a'n Norwich goal hnihna khung lehin goal dang a luh belh tawh lo.

Entu 85,000 hmaah Norwich City 2-0 in a chak a, season thara Premier League khel turin an tling.

Vanduai Boro

Wembley Stadium hi inkhel pawimawh bik khelhna a ni a, club nazawng tan khelh theih a ni lo. Middlesbrough hi ṭum nga Wembley Stadium-ah hian an inlan tawh a, an chak lo vek.

Tun season-ah Boro hian 4-0 leh 1-0 in league-ah Norwich hi an hneh a, amaherawhchu a pawimawh ber Championship Playoff-ah an chak lo.

Middlesbrough head coach Aitor Karanka chuan, "Kan tan chuan tawrh thiam har tak a ni. Premier League khel turin season tluanin theihtawp kan chhuah a, keini aiin kan khingpui an khel ṭha zawk a, an tisual ve lo. Keini chu vawi hnih kan tisual a, kan lamah a goal ve ve. Chutihrualin theihtawp chhuahtu kan player-te leh mipuite ka fak a ni," tiin a sawi.

Karanka chuan chhunzawmin, "Helai hmun (Wembley) kan thleng thei hrim hrim hi a lawmawm a ni. Tun season-ah kan team-in hmasawnna tam tak kan nei a, season tharah kan chhunzawm ang. Middlesbrough khua hian Premier League club neih a phu a, ka hna a nih angin chawlh loin ka thawk chhunzawm nghal ang," a ti.

Norwich an lawm

Nowich City neitu zing ami Delia Smith chuan, "Kum 2009-a League One (Championship) a kan tlak thlak khan kan supporter-te'n ticket lei an ṭhulh chuang lo. Club tana an rinawmna vang hian tun hun thlen hi an phu a ni. Kan manager kha a inringtawk em em a, a hlauthawng lo. Tawp chin nei loa fak ka duh a, amah leh player-ah khan beiseina sang tak ka nei a ni," tiin supporter, manager leh player-te chu a fak hle.

Norwich manager Alexander Francis Neil hi Scottish a ni a, kum 33 leka upa a ni. Swansea manager kum 36-a upa Garry Monk aia a naupang zawk avangin Premier League manager naupang ber tur a ni.

Neil chuan, "Premier League har dan tur hi ka chiang a, club te ber zing ami kan ni dawn. Amaherawhchu keini aia club te zawk pawhin hlawhtling takin an khel thei a, chona hmachhawn hi kan ngam a ni," tiin a sawi.

Neil hi feet 5 leh inches sarih leka sang niin kum 1999 khan Scottish first division club Airdrieonians tan a khel ṭan a. Hemi hnu hian Barnsley, Mansfield Town leh Hamilton Academical tan a khel bawk. April 2013 khan Hamilton manager Billy Reid a bang a, Neil hian player/manager hna a chelh nghal.

Manager hna chelh kum khatnaah hian Hamilton chu kum 76 chhunga a vawi khatna atan Scottish Premiership a kai pui a, tun ṭum ang tho hian Scottish league sang ber hi playoff hmangin a thleng.

January 9, 2015 khan Neil hi Nor­wich manager atana tih nghet a ni a, mipui ṭhutna aṭangin manager a nih aṭanga ni hnihna Norwich leh Bournemouth inkhel a thlir a. Hemi ni hian club hi la enkawl ṭan lo mah se 1-0 a an chak loh hnuin team enkawl turin technical area-ah a chhuak thla a, 2-1 in a chak pui. Bournemouth hi tun season-a Championship champion an ni.

Neil-a hnuaiah Norwich hi ṭum thum chauh an chak lo a, league-ah pathumnaa awmin pakhatna Bournemouth point li chauhin an pha lo. Amaherawhchu playoff-ah hlawhtlinna an chang a, harsa zawk leh ropui zawkin Premier League an thleng.