Gerrard - Khawtual naupang aṭanga club legend

"Ka thih ni a hnaih hunah pawh damdawi-inah min hruai loin Anfield-ah min hruai rawh u - he hmunah hian ka piang a, he hmunah bawk hian ka hun hnuhnung hman ka duh a ni," tia sawitu Steven Gerrard hi Liverpool fan-te'n an atchilh em em mai hi a mak hran lo.

Kum 1980, May 30 kha Liver­pool tan chuan kum chhinchhiahtlak leh ni hriat reng tlak a ni tawh ang. Captain ropui leh Liverpool mai ni lo English football an sawi apianga hming lang tel ziah tawh tur Steven Gerrard pian kum leh thla a nih vang a ni.

Kum 1989 Hillsborough disas­ter-ah Gerrard-a cousin Jon-Paul chu kum sawm mi lek nichungin a thi a, Hillsborough chhiatna vanga thi mi 96 zingah Jon hi naupang ber a ni nghe nghe. A unaupa thihna hi vawiina Stevie G min hmuh tirtu a ni. Liverpool captain chuan, "Jon Paul-a tan ka inkhel a, ka cousin pakhatin min boralsan tih ka hriat khan awih a har em em. A chhungte tawrh natzia ka hmuh khan vawiina ka dinhmun hi min hruai thleng a ni," a ti.

Kum 35-a upa Stevie G hian season tharah a hmangaih Liverpool a kalsan tawh dawn a, Liverpool fan an ngui a, khawvelin Steven Gerrard tel lohna Liverpool a mitthla thiam lo.

Gerrard ngaisangtu amah enkawltu coach-te

November 29, 1998-a Steven Gerrard-a'n Liverpool tana a game hmasa ber a khelh khan Reds fan tam tak chuan star thar a piang dawn tih an hre kher lo ang. Kum 18 leka upa Gerrard hi Blackburn Rovers laka 2-0 a hma an hruai laiin a rawn tlan lut a, minute khat vel chiah a awm tawh tiha rawn tlan lut Stevie G-a Liverpool zinkawng duhawm a inṭanna chiah a ni.

Liverpool tana a game hmasa ber Stevie khelh tirtu Gerard Houllier chuan, "Khatih laia U19 team inkhel en turin ka kal a, U17 player pakhat chu an zingah khan khelin a aia upa zawk rual bulah khan a zam lo. A au a, khelh dan tur hrilhin a kawk kual zung zung a, Liverpool-in hruaitu ṭha kan nei dawn tih kha ka hmu nghal. A tuka senior team training zawm turin ka sawm nghal a ni," tiin Gerrard-a a hmuhsak ber ṭum a sawi.

Kum 2001-a Liverpool treble cup champion nihpuitu Houllier chuan, "Stevie hrilhfiahna ṭha ber chu 'class' tih hi a ni tawp mai. Football in a kaihhnawih tawh phawt thilah chuan 'Stevie' hi class tia hrilhfiah a awl ber," a ti.

Liverpool manager a nih chhunga Champions League leh FA Cup-a champion puitu Rafael Benitez chuan, "Steven Gerrard hi khawvela midfielder ṭha ber pawl, khawilai hmunah pawh khel mah se buai ngai lo a ni. Player ka enkawl tawh zingah a ni anga thiam an awm lo. A player puite a chawh phur thiam dan hi a mak a ni," tiin a captain hlui chu a chhuang hle.

Player puite dahsan Gerrard

Liverpool striker hlui Peter Crouch chuan, "Awihawm loh khawpa career duhawm Stevie hian a hmang a ni. Ni khat chauh a ni nen hian khel dun leh thei dawn ila, ka FA Cup medal nen hian thleng ka phal a ni," tiin Gerrard a dahsan zia a sawi.

Real Madrid legend Zinedine Zidane chuan, "A vanglai kha chuan khawvela player ṭha ber a ni hial ang. Kum 2004 daih tawh khan Real Madrid president Florentino Perez hnenah Gerrard nena khelh dun ka châk thu ka hrilh a, vawi hnih lai lakluh tumin bei mah se kan hlawhchham. Stevie rinawm zia chu kha khan a pholang chiang a, Real Madrid meuh vawi hnih hnar thei player hi an awm lo," tiin Liverpool tana Gerrard rinawm zia a sawi.

AS Roma captain chhuanvawr Francesco Totti chuan, "Ka duh­thusam World XI min thlan tir se chuan Steven Gerrard hi ka captain atan ka thlang ang. A bula khelh ka châk leh châk loh min zawt a nih chuan ka chhanna chu 'ani ang player bulah tunge khelh châk lo ang?' tih hi a ni. Player ropui tak, a ṭul huna team chakpui thei a ni a, khawvel club zawng zawng hian ani ang player hi chu an duh vek ang," a ti.

AC Milan player ropui ṭhin Paolo Maldini chuan, "Gerrard ka theihnghilh theih lohna chu 2005 Champions League final kha a ni. Hmun tinah khan hmuh tur a awm a, defence an talbuai tih a hriat khan tlarhnung a pui nghal a, Milan player kha chu ball chhuhsak nghal zel kha a tum tawp a ni. Inkhel kha kan thunun a, mahse danglamna thlentu chu Steven Gerrard a ni. Ani anga 'complete player' hi an tam lo," tiin a fak hle.

Tunge Steven Gerrard?

May 30-a kum 35 tling mai tawh tur Steven Gerrard hian kum kaw mi lek a nih laiin Liverpool Academy a zawm a, Reds a zawm hma hian Academy hrang hrangah trial a nei kual nasa hle. A trial neihna zingah Liverpool hmelma kum hlun Manchester United pawh an tel. Kum 2006-a a chanchin a ziahna lehkhabuah Stevie G chuan Manchester United-a a trial chhan chu contract sign pui tura Liverpool a nawrna a nih thu a sawi.
"Team hrang hrang ka hmachhawn tawh jersey, inkhelh zawha kan inthleng hi ka inah hmuh tur a awm nual. Mahse, Manchester United player erawh jersey ka thleng pui ngai lo. Ka inah United jersey in hmu lo ang," titu Gerrard hian November 5 1997 khan Liverpool tan a professional contract hmasa ber a ziak a, 1998-ah senior team tana a match hmasa ber a khel thung.
Kum 2002-03 season-ah Sami Hyypia kut
aṭangin Liverpool captain dinhmun a chelh ṭan a, hetihlai hian kum 23 chauha upa a ni. Kum 2010 August-ah England captain tana ruat a ni a, July 21, 2014-ah international football a chawlhsan.
Liverpool-a kum 17 a khelh chhungin a team tan trophy lian tham sawm lai a chawi a, mimal chawimawina engemaw zat a hui bawk.
FA Cup-ah vawi hnih, League Cup-ah vawi thum, Champions League vawi khat, UEFA Cup vawi khat leh UEFA Super Cup vawi hnih a chawi te kha a trophy chawi lian zual te an ni.
Mimal chawimawina liantham a dawn zingah PFA Players' Player of the Year 2006, PFA Young Player of the Year 2001, PFA Fans' Player of the Year 2001, 2009, England Player of the Year Award 2007, 2012, UEFA Team of the Year 2005, 2006, 2007, FIFA/FIFPro World XI 2007, 2008, 2009, UEFA Club Footballer of the Year 2005 leh PFA Team of the Year 2001, 2004, 2005, 2006, 2007, 2008, 2009, 2014 te hi a langsar pawl an ni.
Stevie G hian England tan match 114 khelin goal 21 a khung a, Liverpool tan match 708 a khelhah goal 186 lai a khung thei bawk. Reds tana a season hnuhnung berah Stevie-a'n match 37 a khel a, goal 13 khungin tun season-ah Liverpool player zinga goal khung hnem ber a la ni fan.