Derby della Capitale-ah Roma an chak

Rome derby 'Derby della Capitale'-ah AS Roma-in Thawhṭanni zan khan hun tawp dawna Mapou Yanga-Mbiwa goal hmangin Lazio 2-1 in an hneh.

Champions League khel turin Roma an tling chiang a, Lazio erawh match hnuhnung bera Napoli an khelh zawhah a chiang chauh ang.

Playoff pumpelh tum

Serie A-ah a sang pahnihin Champions League group stage an khel nghal a, pathumna tan UCL playoff khelh a ngai.

Inkhelh ṭan hmain Roma leh Lazio inthlauhna hi point hnih chauh a ni a, Lazio-in playoff khel turin chak an mamawh.

Amaherawhchu Roma zawk an chak avangin Lazio leh palinaa awm Napoli inthlauhna chu point thum a ni. Italy-ah head to head en hmasak ber a ni a, Lazio hi an inhmachhawn hmasak zawkah 1-0 in chak mah se league match hnuhnung berah an inkhelh leh dawn avangin Italy aṭanga playoff khel tur hi a la chiang lo.

Inkhel chu

Lazio-in bul an ṭan ṭha zawk a, minute ngana lekah Miroslav Klose chuan a tauh lut lo a, yard ruk aṭanga German head master Klose-a'n a tauh lut lo hi mak hle.

Lazio-in first half an thunun a, Roma-in chanve vawi khat chiah an nei thung. Tun season-a Roma bul ṭan chhiat ber ṭum a ni.

Second half-ah Roma an ṭha sawt lo a, amaherawhchu minute 73-naah chance hmasa ber an nei a, Roma midfielder Radja Nainggolan thawhrah sengin Juan Manuel Iturbe-a'n goal hmahruai a khung.

Khel ṭha zawk Lazio-in minute 81-naah Filip Djordjevic hmangin an sipurh an sut. Hun tawp hma minute li chauh a awm tawhin Roma midfielder Miralem Pjanic freekick petah player pathum ṭhawt offside mah se goal khungtu ber Yanga-Mbiwa position a dik si avangin goal-a pawm a ni. Inkhel pawimawhah Roma 3-1 in an chak.

Engnge an sawi?

Roma manager Rudi Garcia chuan, "Kan game plan a hlawhtling. Minute 15 hnu lam kha chuan goal venhim kha kan hna ber a ni a, Lazio-in Nilainiah minute 120 chhung an khelh avangin an fitness a ṭhat tawk loh kan beisei a, kan tidik chiah a ni," tiin a sawi.

Lazio manager Stefano Pioli chuan, "Ni li chhungin vawi hnih kan chak lo a, kan rilru a na takzet a ni. Hei hi football a ni a, chak loh chang a awm tur a ni. Season ṭha tak kan nei a, inchhirna tur ngah lutuk chuan season kan khar bik lo ang," tiin match hnuhnung bera Napoli hneh ngei an tum thu a sawi.

Lazio hian Coppa Italia final-ah Juventus chu extra time-ah an hneh lo.