Player ṭha zawk nih tum Kane

Tun season-a rin phak baka che ropui Tottenham Hotspurs striker Harry Kane chuan season tharah tun aia ṭha zawk leh ropui zawka lo kir a tum thu a sawi.

Kum 21-a upa English striker chuan, "Engkim hi ka kuta innghat a ni. Player thawkrim leh hmasawn zel duh mi ka ni a, chu chiah chu tunah chuan ka rilruah a awm rih a ni. Ka kutah engkim a innghat a, player ṭha zawk nichungin season thar ka hmachhawn theih ngei ka beisei," a ti.

Kane hian tun season Premier League-ah goal 21 khungin Tottenham player ropui tak tak Teddy Sheringham, Jurgen Klinsmann leh Gareth Bale te record a nih rual. Mahse, tun season-a England tana a match hmasa ber kheltu chuan, "Anni ang player ropui nena khaikhin tur chuan kawng zawh tur tam tak ka la nei a, khaikhin chi kan la ni lo. Tun season kha ka tan chuan rin phak bak a ni a, ka theihnghilh tawh lo ang. Hmasawnna tur tam tak ka la nei a, season tharah tun aia ṭha zawk hian khelh ka tum a ni," tiin a phur hle.

Manchester United chuan Spurs striker hi lakluh an tum niin thuthang a awm a, mah se tun dinhmunah chuan Harry Kane hi Spurs-ah hian nghet hle.