Valencia chhuahsan duhtu Otamendi

Manchester United-in lei tuma an hel mek Nicolas Otamen­di chuan Valencia chhuahsan a duh. Valencia defender agent Eugenio Lopez chuan a player hian Spanish club chhuahsan turin a theih ang anga hma a lak thu a sawi.

January thlaa Manchester United pan tur anga lo thang tawh Otamendi chungchang hi sawiin a agent chuan, "Nico hian Valencia chhuahsan a duh a, a chhuah theihna tur kawng tunah hian a dap mek a ni," a ti.

Eugenio Lopez chuan club sporting director Francisco Rufete-a'n Otamendi chung­chang engmah a hriat loh thu a sawi chu dawt a nih thu sawiin, "Nico hian thla hnih liamta khan club president Amadeo Salvo hnenah chhuah a duh thu a lo sawi tawh a, club sporting director-in engmah hre ve lo anga a insawi hi chu dawt a ni," a ti.

Lopez chuan Argentine international chungchang hi sawi chhunzawmin, " Nico hian Valencia nuam a ti em em a, club leh fan te hi a ngaina em em a ni. Mahse, professional player a nih angin hmasawn a duh a, hma a sawn theihna tur hmun pan a duh a ni," a ti.