Real Madrid-in Ancelotti an ban

Carlo Ancelotti-in Real Madrid a enkawl kum khatnaah Champions League, Copa del Rey, UEFA Super Cup leh FIFA’s Club World Cup-ah Spanish club lian hi a champion pui nghal a, season hnihnaah nomawi a chawi lo a, ban a ni.

Club president Florentino Perez chuan, "Thutlukna awlsam a ni lo," tiin Ancelotti ban chungchang a sawi a, hemi hma hian Italian manager chungah lawmthu a sawiin karleh lam khian manager thar an puan tur thu a sawi. Napoli manager Rafael Benitez chu Real manager thar tura rinkai a ni.

Perez chuan sawi chhunzawmin, "Ancelotti hian tihsual a nei em? Ka hre lo. Player-te leh fan-te'n Carlo hi an ngaina em em a, chutiang tho chuan keipawhin anni nena thawhduh hi nuam ka ti. Amaherawhchu Real-in hlawh­tlinna mamawhna hi a sang em a ni," a ti.

Kum 68-a upa Perez chuan, "Chiang takin engkim sawi vek a ṭul lo a, season tluanin kan bihchiang a, season tawpah thutlukna kan puang mai a ni. Real-in coach kan thlak ngun tih an sawi chu ka hria a, mahse Europe club ṭha Atletico Madrid, Barcelona, Chelsea, Bayern Munich leh Juventus te pawh hi an danglam bik lo," tiin a in sawi fiah.

Season liamta khan Real chuan Champions League final-ah an hmelma Atletico Madrid chu extra time-ah 4-1 in an hneh a, June 2014 khan ṭum 10 nan European champion an ni. Ancelotti hian kum 2003 leh 2007 khan AC Milan chu Champions League-ah a champion pui tawh a, mahse July 2013-a Paris St Germain aṭanga Real a zawm hnuah La Liga title a lak pui lo.

Italian manager contract hian a contract-ah season khat dang nei mah se January thla khan Copa del Rey aṭangin Atletico Madrid-in an pet chhuak a, Champions League semifinal-ah Juventus lakah an tlawm a, league-ah champion Barcelona chu point hnihin an pha lo bawk.

Kum 55-a upa Ancelotti record hi chhe lo mah se club president Perez sawi ang khian Real chuan hlawtlinna an duh takzet a, manager ban hi an tan thil thar a ni lo.

Manchester United-in kum 1986-ah manager atan Alex Ferguson an la lut a, kum 2015 thlengin manager pathum chauh an nei a; Real erawhin hmei chhung hian manager 27 an nei hman. Arsenal-in kum 1996-ah Arsene Wenger an la lut a, French manager hian tun thlengin London club hi a la enkawl a, hetihlai hian Real hian kum 1996 aṭanga chhiarin Ancelotti hi an manager 19 banna chiah a ni.

Ban a nih hma khan

Real Madrid-in an manager chung­changah mipui ngaihdan an la a, supporter thutlukna chu Ancelotti chunga rinna nghah zel a ni. Zirtawpni khan Getafe nen an inkhelh tur chung­changah press conference neih a ni a, a zawh rualin media lamin Italian mana­ger zahna lantir nan an ding rual a. Inrinnia Getafe nena an inkhelh hmain mipui lamin zahna an lantir chhunzawm bawk.

Real Madrid-in Getafe 7-3 in an sawp a, hattrick siamtu Cristiano Ronaldo chuan social media kaltlangin uar takin Ancelotti nena thawh dun a duh thu a sawi a, player dang pawh an ngawi mai mai lo. Chutichung chuan Perez hian a beng a chhu ngawng tlat a, rin lawk ang ngei, mak tak siin Ancelotti hi ban a ni ta a ni.

Italian manager chuan, "Ka nghawng­ah hian harsatna ka nei a, ka kutah nghawng a nei tawh a, ka ke a rawn thleng thei bawk. Chuvangin Real ka enkawl chhunzawm lo a nih chuan kum khat chhung chu ka chawl ang. Chutihrualin ka hliam vanga chawlh rei ngai tur chen erawh ka chiang bik lo," tiin Italy, England leh Germany aṭanga sawmna a hmuhte chu a hnar tur thu a lo sawi tawh.

Ban a nih hnuah Ancelotti chuan, "Kum hnih chhung hun hlimawm tak Real Madrid-a ka hman hi ka theihngilh lo ang. Club hruaitute, supporter-te leh player-te chungah lawmthu ka sawi e," tiin twitter-ah a ziak.

Tunge thlak dawn?

Tarlan tawh angin Ancelotti thlak turin Benitez chu rinkai lawr lak a ni rih a, hming sawi rik zingah Borussia Dortmund coach Jurgen Klopp, Germany manager Joachim Low, Sevilla manager Unai Emery, Real Madrid player hlui Olympiakos coach Michel leh Madrid youth team boss Zinedine Zidane-a te an tel bawk.

Real president Perez chuan, "Real Madrid coach atan chuan Spanish ṭawng ngei hmang pawh a awhawm ve tawh alawm le," tiin a sawi a. Champions League-a Liverpool champion puitu Benitez a sawina niin a lang.

FIFA agent Ernesto Bronzetti pawhin Benitez chu 99%-in Real a zawm chian tur thu a sawi ve bawk.

Real hian Ancelotti an ban hi a mak lo a nih ngai chuan manager thar tur hmabak hi a awlsam lo khawp ang.