Major League Soccer lam hawi tum Drogba

Chelsea striker kalchhuak tur Didier Drogba chuan Premier League club danga a kal a tum loh thu leh Major League Soccer lam hawi a rilruk thu a sawi.

Kum 37 a upa Drogba hian a contract a hman zawh tawh avangin a duhna lam lam a hawi thei tawh a, inkhelh chawlhsan nghal mai loin United States emaw Australia-ah emaw kal a rilruk a ni.

Pathianni khan Drogba hian Chelsea tana a match hnuhnung ber tur a khel a, hun tawp hmaa lakchhuah niin a ṭhiante chuan khelmual aṭangin an zawn chhuak hial. A club te hi Premier League champion nomawi a chawi pui nghe nghe.

MLS lama kal a duh leh duh loh an zawhna chhangin Ivory Coast captain hlui Drogba chuan, "Duh tehreng mai, mahse tunah chuan thutlukna ka la siam fel nghal mai thei lo. Kar hnih khat tal chu inngaihtuah nan hun hman phawt chu a ṭha ang," tiin a sawi.

EPL team dang zawm a duh leh duh loh an zawhna pawh chhangin Drogba chuan, "Eng­land-ah hian club ṭha tak tak leh player ropui tak tak an awm a, an zinga inkhelh chu chakawm tak a ni. Mahse, ka club Chelsea hi ka hmangaih avangin club danga khelh chu ka thei lo ang. Chelsea hmachhawn zawnga inkhel chu ka duh loin ka thei lo a ni," tiin a sawi bawk.

Tun hnaia chhuak mai tur anga an sawi Chelsea goalkeeper Peter Cech chu Chelsea-ah kum khat tal cham rih se a duh thu a sawi lang tel bawk. Chelsea goalkeeper hi Arsenal emaw Manchester United-ah emaw kal tur anga sawi thuthang a awm mek.