Blatter a tlin nawn chuan FIFA a bawlhhlawh lehzual ang - Platini

Pathianni khian FIFA president thlanna Zurich-ah neih a ni dawn a, UEFA president Michel Platini chuan FIFA president ṭanglai Sepp Blatter thlan nawn a nih chuan football-in a tawrh tur thu a sawi.

Platini chuan, "Blatter-a'n FIFA president a chelh chhung chuan, a duh emaw duh lo emaw; a dik emaw dik lo emaw pawh ni se FIFA zahawmna a tlahniam ang a, tun aiin a hmelhem lehzual ang. FIFA thuneihna a tla hniam dawn tihna a ni a, a pawi lai ber chu football-in a tuar tur hi a ni," tiin Blatter chu tling nawn lo tura a duhthu a sawi a. UEFA president hian Zurich-a inthlan awm hunah Jordan Prince Ali Bin Al Hussein a thlawp tur thu a sawi tel bawk.

Kum 59-a upa French pachal chuan sawi zelin, "Mimal taka Blatter sawisel hi ka duh lo a, amaherawhchu engti kawng zawng mahin a lal nawn hi ka duh lo a ni," tiin FIFA president thar awm theih nan a ṭang hle.

English Football Association leh Scottish FA pawhin Luis Figo leh Michael van Praag te inhnuhdawh hnuah Prince Ali chu FIFA president atan an thlawp dawn. Amaherawhchu kum 79-a upa Blatter hi FIFA continent paruk zinga panga ten an thlawp tlat avangin ṭum ngana atan a tling ngei tura rin a ni.