All Mizoram Inter Village Football : Kolasibin goal 21 an khung!

GIG Motors All Mizoram Inter Village Football Championship-ah round of 64 khelh a ni tawh a, nimin khan Kolasib Jt. VC chuan Sakawrtuichhun lakah goal 21 ngawt an khung - Sakawrtuichhun lamin a chhanletna an nei ve bawk si lo a, RG Stadium-a inkhelah 21-0 in Kolasib an chak.

Kolasib tan hattrick siam pali ngawt an awm - RM Zothansanga leh Isaak Malsawmkima ten goal li ve ve an khung a, captain Paul Ramfangzauva leh Samuel Lalruatfela ten goal thum ve ve an khung bawk. First round 'bye' Kolasib hmaah dawl zawrin Sakawrtuichhun an zawr.

Bethlehem Vengthlangin veng ṭhenawm ITI Veng lakah ṭhat chhuah duh loin, 2-0 in an hneh a, Tlangnuam chuan 6-1 ngawta Ramhlun South hnehin, Vincent Lalduhawma chuan hattrick a siam.

Armed Veng lama inkhelah Lalhmangaih-zuala'n Thenzawl tan hattrick siamin, Hualngohmun lakah 6-1 in a team a chakpui a, Mission Veng pawhin inkhelh an thiam tih pholangin, Kanhmun chu 3-1 in an hneh. Durtlang pawhin a tikimtu nih an tum lo tih pholangin, Ṭhuampui chu 8-0 ngawtin an sawp!

Melthumin Lallian-sanga hmangin Chanmari West chalah chil an hnawm a, Chanmari W hian goal nga ngawta chhangletin, 5-1 in an hneh. Chawnpuiin T. Vanneihtluanga hattrick hmangin Aibawk chu 4-0 in an sawp a, Chanmariin Airfield Veng chu 7-3 in an hneh bawk - vawiinah inkhel pahnih a awm ang a, round of 32 lut a hriat kim chiah ang.