Manchester City-ah Pep Guardiola a cham dawn
Premier League club-ten an thu hriat châk loh tak an hria - Manchester City manager Pep Guardiola chuan Etihad Stadium-ah kum khat dang cham turin contract thar a ziak a, season tawpah Manchester khaw club hi a chhuahsan dawn lo.
Pep hian season tawp thleng bak Etihad Stadium-ah hian contract a nei tawh lo a, contract thar a ziah lawk bawk si loh avangin fans tam zawkin chhuak mai tur angin an ngai hman hial.
Mahse, Spanish coach hian nimin lamah thuthar a nei a, English club hi chhuahsan lo turin thutlukna a siam. Pep hian season khat chu City a enkawl leh dawn tihna a ni a, amah lo beisei ru ve rengtu club ṭhenkhat tan rimawi a tling mawlh lo ang.
He thu buatsaih a nih lai hian Pep-a chungchangah Manchester City-in thuchhuah an la siam lo a, mahse, khawthlang media-te chuan Pep hi a cham ngei dawn, tiin huai takin an tarlang tawh - he thuziak i chhiar meuh chuan official-a thuchhuah a awm tawh hial ang.
City dintu
Pep-a awm hmain Manchester City hi English club ṭha zingah chhiar tel a ni daih tawh a, Arab sum mawm an chawm aṭangin English club langsar ho an el phak tawh. Mahse, chutiang taka team ṭha chu Pep hian ṭha lehzualin a tuai hnum tiin a sawi theih.
Kum 53 mi manager hian kum 2016 khan City hi a zawm a, nomawi 18 a chawipui - heng zingah hian 2022-23 season-a treble champion a nihpui chu a tel a, English club zingah Manchester United tih loha treble champion thei awmchhun an ni.
Hei chauh a ni lo - English top flight league-a season li a zawna champion thei hmasa ber an ni a, Premier League season khata point 100 hlawh chhuak thei hmasa ber record an siam bawk.
Pep-a hnuaiah City hian league nomawi paruk, FA Cup (2), League Cup (4), FA Community Shield (3), Champions League (1), UEFA Super Cup (1) leh FIFA Club World Cup (1) nomawi an chawi a, Spanish coach record hi a ropui hle.
Pep a chul?
Jurgen Klopp nen rei tak an inel a, tun hnaiah Mikel Arteta a lo lang a, Klopp-a chhuah vangin hahdam sawt tura ngaih a nih laiin Arne Slot a lo lang leh bawk - tun dinhmunah City hi league table-ah pahnihna an ni mek a, point ngain hmahruaitu Liverpool an phak lo.
Hei mai a ni lo. City hi inelna hrang hrangah match li zet chu a zawnin an tlawm ta a, Pep-a'n coach hna a chelh hnuah, penalty chhiar tel loha a zawna a tlawm rei ber record a siam a, "Pep a uaithla ve ṭan em ni?" tiin an inzawt.
Brighton & Hove Albion laka 2-1 a an tlawm zawh hnu phei chuan Pep hian, "Kum sarih chhungin Premier League nomawi paruk zet kan chawi a, club dang champion hun a thleng ve tawh a ni mahna," a ti a, Pep meuh pawh beidawngin a ṭawng chhuak.
Hei vang hian tam takin Spanish coach hi contract thar ziak lo a, chhuak mai tur angin an ngai hman a, mahse, Krismas rim a nam meuh chuan Pep a cham dawn, tih kan hre leh ta - a la beidawng lo.
Club tan
May thlaa City-in a zawna a vawi li nana league nomawi an chawi khan Pep-a'n City ṭantute rilru nghawng nghir dawt thei chanchinthar a nei a, Barcelona boss hlui hian, "Cham aiin chhuah lam ka hnaih zawk a ni," a ti.
October thla khan City hmasawnna kawnga pawimawh em em mai, director of football Txiki Begiristain chuan season tawp ruala Etihad Stadium a chhuahsan tur thu a sawi a, Pep chuan, "Ka pang lehlam kim lo ang mai a ni dawn a ni," a ti - fan-ten chhuah ve a tumnaah an ngai.
Hetiang boruak karah hian, tun hnaiah result an nei ṭha bawk si lo a, tam tak chuan tun hnaia City result chhiat chhan chu Pep-a hma hun a chian lawk theih loh vang niin an sawi a, hei hian team-ah nghawng a neih niah an ngai.
Pep hian, "Club tana ṭha ber tur ngaihtuah zel chungin thutlukna kan siam ang," a ti - tunah chuan a cham dawn a, club tana ṭha ber turin thutlukna a siam ta niin a lang.
Engtin nge?
Pep hian inngaihtuah nan hun a hmang rei hle - thla hnih liam ta khan City chuan contract thar ziak turin an dawr daih tawh a, mahse, a chhang lawk duh lo. Football Association pawhin England coach turin an dawr bawk a, anni pawh thla hnih ngawt a nghahtir!
Spanish coach hian City-a cham zel hi a fuh ang em? tih uluk takin a ngaihtuah a, England enkawl pawh amah leh a chhungte tan thutlukna ṭha a ni ang em, tih a ngaihtuah. European football expert Guillem Balague chuan, "Sum vang a ni lo a, sporting lam kaihhnawih pawh a ni lo.
"A nunah eng nge tihzel a duh a ngaihtuah a, thutlukna siam kha a harsat a ni," tiin Pep-a chungchang hi a sawi a, a tawpah chuan contract thar a ziak ta. Pep hian Pathianni khan a ṭhianṭha leh chhungte hnenah chuan City-a a cham tur thu a sawi tawh.
Pep hi mahni hnaa rilru leh ngaihtuahna zawng zawng senga pe chi a ni a, hemi vang hian City-a a hun chu duhtawk tawha ngaihna a lian hman - mahse, Pep-a'n a la duhtawk lo a, City-ah a cham zel dawn.
Hmabak chu
Pep-a'n City-ah contract thar ziak lawk lo mah se, a cham ngei rinna City lamah hian a lian hle niin an sawi - tuna a contract pawh hi kum khat chauh ni mah se, kum khat dang pawhsei theihna dan a tel nia sawi a ni.
Mi tam takin a ṭhian ṭha Begiristain chhuah dawn vanga chhuah hnial lo angin sawi mah se, hei erawh a dik tawk lo nia sawi a ni a, thil lian tak pakhat chu Champions League nomawi a chawi kha niin an sawi.
Pep hian, "Enge ka tih leh chuan ang?" tiin City-ah hian hlawhtling tawk tawhah a inngai a, khaw dang hawi a pawi ti lo hman. Tunah erawh cham a thlang a, a hmabakah hna hautak engemaw zatin a hmuak.
City-a a hlawhtlin theih nana player pawimawh Kevin de Bruyne chuan season tawp rualin contract a hmang zo tawh dawn a, player langsar Bernardo Silva, John Stones, Kyle Walker leh Ederson te pawh 2026-ah an contract a zo dawn - cham tura hmin chu Pep-a hna tur a ni ang.