Endrick-a'n Saints pan dawn lo

Real Madrid rawlthar Endrick chu loan-a Southampton pan tur anga sawi thawm awm mah se a chhuak dawn lo a, football journalist lar Fabrizio Romano chuan Spanish champion hian an player chhuah lailawk tir tumna an neih loh thu a sawi.

Kum 18 mi Endrick hian nipui lai khan Palmeiras aṭangin Real hi a pan a, a man zat pawh euro maktaduai 60 ngawt niin a chungah beiseina a sang hle. Mahse, Kylian Mbappe, Vinicius Junior leh Rodrygo te neitu Real tan a inlan phak meuh lo.

Brazil tan match 13 inlana goal thum khung tawh striker hian tun season inelna hrang hrangah Real tan match 10 khelin goal hnih a khung a, assist vawi khat a nei - khelmuala a minute hman zat belhkhawm hi 122 bak a la ni lo.

Hetiang boruak karah hian Saints-ah loan-a kal mai tur anga sawi thawm a awm a, mahse, Romano thusawi aṭang chuan a chhuak leh dawn lo niin a lang.