India-ah Messi inkhel dawn?

Kerala sports minister V Abdurahiman chuan India-ah Lionel Messi a lo kal tur thu a puang a, Messi captain-na hnuaia khel Argentina chuan nakkum hian Kerala-ah friendly match an khel dawn niin a sawi.

V Abdurahiman chuan, "Lionel Messi telna, khawvel team-a no. 1 ni mek Argentina chu Kerala-ah an lo kal dawn e," a ti a, sum leh pai chu Kerala Gold & Silver Merchants Association leh Kerala sumdawng pawl dang puihnain an neih tur thu media hmaah a puang.

World Cup nomawi an chawi hnuah Argentina FA chuan match khat an khelh zelah dollar maktaduai nga chu an fee atan an ti a, hei hi India pawisa chuan cheng vaibelchhe 42 zet a ni dawn - a turu rem rem hle.

Kumin kumtir khan Kerala sorkar aiawh, V Abdurahiman-a kaihhruaite chuan Argentina Football Association thuneitute Spain-ah inbiakna an neihpui a, an inbiak dan chuan La Albiceleste hian Kerala-ah hian match hnih tal an khel dawn.

Kerala Sports Minister chuan, "Tun hnai ni 45 chhungin AFA aiawhten Kerala an lo tlawh ang a, official takin inkhel tur hi kan puang ang. AFA hian inkhelh ni tur leh an hmachhawn tur team an puang a, an khelhna tur stadium pawh anmahnin an rawn thlang thlap dawn a ni," a ti.

Hetihlai hian Kerala chief minister Pinarayi Vijayan pawhin social media lamah Argentina lo zin tur thu hi puangin, "Kerala chuan FIFA World Cup Champions Argentina lo mikhualin, bung thar kan kai dawn e. Kan beisei ṭhin chu a tak ram a thleng dawn ta a, state sorkar thawhrimna leh Argentina national team-te min thlawpnaah lawmthu kan sawi a ni," a ti a, Kerala-ah Messi a inkhel ngei dawn niin a lang.