Mata-a'n MLS club nei

Chelsea leh Manchester United midfielder hlui Juan Mata chuan inkhelh a chawlhsan hma hauhin a sumdawnna a zauh zel a, Major League Soccer club thar tur San Diego FC-ah share tenau a nei ve dawn.

Kum 36 mi Mata hian inkhelh a la chawlhsan lo a, September thla khan A-League club Western Sydney Wanderers chu a zawm a, inkhel reng chunga MLS club-a share nei hmasa ber record a siam.

Mata chuan, "San Diego FC neitu zinga ka tel thei hi ka hlim takzet a, he club innghahna khawpui leh MLS ṭhanzia ka hmuhin, an zinga ka tel ve thei hi ka lawm a ni," tiin a sawi.

San Diego chairman Sir Mohamed Mansour chuan, "Mata hi hlawhtlinna chang reng ṭhin a ni a, club-in hmasawn zel kan tumna kawngah, kan zinga a lo tel ve thei hi a inhmeh em em a ni," a ti.

Real Madrid academy chhuak Mata hian Real tana a khelh phak loh hnuah Valencia tan hming chherin, a hnuah Chelsea leh Manchester United tan a khel a, English club langsar pahnih tana khel siin Premier League nomawi erawh a chawi miah lo!

Mahse, club pahnih hi FA Cup leh Europa League-ah a champion pui ve ve a, heng bakah League Cup leh FA Community Shield nomawi chawiin, kum 2012 khan Chelsea chu Champions League nomawi a chawipui.

Blues a chhuahsan hnuah Turkish club Galatasaray leh Japanese club Vissel Kobe tan a khel a, tunah chuan Australia lamah a khel mek - Spain tan vawi 41 inlana goal 10 khungtu hi sumdawnna lamah a inhmang nasa hle.

November 2012 khan Spanish club Real Oviedo-ah Santi Cazorla leh Michu te nen share tenau an lo lei tawh a, Spanish restaurant lar Tapeo & Wine neitu zingah a tel a, Formula 1 lamah pawh Alpine F1 Team neitu zingah a tel - Liverpool full back Trent Alexander-Arnold pawh Alpine neitu zingah hian a tel bawk.

San Diego hian season thar aṭangin MLS hi an khel ve dawn a, Mata bakah hian British-Egyptian sumdawng hausa tawntaw Mohamed Mansour leh Sycuan Band of the Kumeyaay Nation te chu club neitu an ni a, MLS club nei tur hian dollar maktaduai 500 lawih an seng a ni.