MFA-in footballer pariat hrem belh

Mizoram Football Association chuan thuchhuah siamin, tun hnaia Mizoram Premier League 11-a dik lo taka sum lengvel chungchangah mi pariat hremna an ti chhuak - MFA-in a hrem mi pariatte hi football player vek an ni a, kum thum chhung Mizoram football-a inhnamhnawih thei lo turin hrem an ni.

MFA chuan thuchhuah siamin, "MFA chuan MPL11-a hlemhletna leh football hmai tibal thil a chhuina kawngah player hrem tur dang a hmu chhuak leh a, football zahawmna vawnhim a nih zel thei nan heng player-te chungah hian hremna na tak kan lek dawn a ni," an ti a, kum thum atan player-te chu hrem an nih thu an sawi.

Mizoram FA chuan dik lo taka MPL11-a sum thila inhnamhnawih player dang an chhuichhuah theih nana anmahni thawhpuitu player-te chungah lawmthu an sawi a, "Nangmahni vangin football-ah rinna kan nghat ngam a, inthlawpna avangin dik lohna tam tak hailan a ni leh ta a ni," an ti.

MFA hian November 4, Thawhṭanni khan Mizoram football sawi nghing dawt khawpin thuchhuah an lo siam tawh a, football hmel tibaltu club pathum leh official pathum bakah player 25 ngawt hremna a ti chhuak.

Club pathumte hi Sihphir Venghlun FC, FC Bethlehem leh Ramhlun Athletic FC an ni a, official zingah Robert Laldinthara (Sihphir Venghlun) chu kum nga chhung atan hrem niin, kum thum chhung atan Danny Lalduhawma (Ramhlun Athletic) leh Johny Ramthansanga (FC Bethlehem) te a hrem bawk.

Footballer zingah Lalnunzama (Chanmari) leh L Lotha (FC Bethlehem) te chu damchhung atan hrem niin, kum nga, kum thum leh kum khat atana hremte an nei bawk a, tun ṭuma an hrem player pariatte hi kum thum chhung atan hrem an ni.