Amorim hoa training United an phur

Manchester United chuan an saltanna hmun aṭanga hruai chhuak thei tur an zawng a, hmasawn pui thei tur leh nakin hun thlenga an club tihmasawn thei tura an ngaih Ruben Amorim an la lut.

Portuguese manager hian Carrington Training Centre-ah hna a thawk ṭan tawh a, tun hnaia Man United-in training video an tihdarh aṭanga a lan dan chuan player bakah coaching staff an phur hle.

Kar hmasa khan Amorim hian Man United a thleng tawh a, training pawh an nei tawh. An player ṭha ṭhenkhat chu ram tan an feh chhuak mek a, hei vang hian an nih dan tur ang tak erawh chuan training hi an la nei thei bik lo.

Casemiro leh Marcus Rashford te chuan beiseina thar an neih thu an sawi a, anni pahnih hi ram tan an feh chhuah loh avangin an training. England duo Luke Shaw leh Kobbie Mainoo bakah lak thar Leny Yoro te pawh an training bawk.

Shaw hi kumin February thla hnuah a la inkhel leh lo, Mainoo pawh Ocotber thlaa Aston Villa nen an inkhelh hnuah khan a la inlan leh lo a, pound maktaduai 52 man Yoro hian United tan match pangngai a la khel lo thung.

Training an neih china a lan dan chuan Casemiro leh Mainoo ten midfield lailum an luah a, an hma hretah Mason Mount a awm - tlarhmaah Amad Diallo, Rashford leh Antony te an awm thung, hei erawh an khelh dan tur dik tak a la nih a rinawm loh.

Ram tan Andre Onana, Diogo Dalot, Noussair Mazraoui, Matthijs de Ligt, Manuel Ugarte, Christian Eriksen, Bruno Fernandes, Alejandro Garnacho, Rasmus Hojlund leh Joshua Zirkzee te an zinchhuak a ni a, an kir hnuah an khelh dan tur kalhmang tak chu a hriat theih chauh ang.

Kum 39 mi Amorim hi Erik ten Hag ang khan manager a la ni chiah lo, tunah chuan head coach atana lak a ni - Dutch manager ai khan thuneihna a nei tam rih lo mai thei, chutihrualin boruak ṭha nena hmalam an pan a nih erawh chuan dinhmun duhawm zawkah pawh a la ding thei dawn a ni.

Man United hian ten season Premier League match 11 an khelh tawhah point 15 an hmu a, table-ah 13-na dinhmun luahtu an ni - palina Arsenal an phak lohna chu point li chauh a ni thung, sang taka season khar turin insiamṭhatna hun a la nei tihna a ni.

Manager thar Amorim kaihhruaina hnuaia an match hmasa ber atan Pathianni zan dar 10:00 hian Ipswich Town an lenchilh ang.