Bucks chakna Antetokounmpo

Giannis Anteto-kounmpo-a point 41 neih hmangin Milwaukee Bucks chuan nimin zing khan Chicago Bulls chu 122-106 in an hneh. Bucks hi NBA regular season kal laiah vawi ruk an chak tling ve ta chiah.

Fiserv Forum-a inkhelah Antetokounmpo chu player langsar fal a ni leh a, tun season atan match khata point 40 aia tam a neih vawi thumna a ni a, amah thlawptu Brook Lopez leh Damian Lillard te chuan point 21 leh 20 an nei ve leh bawk.

Bulls tan Zach LaVine chuan point 27 nei mah se a team chakpui nan a tawk zo lo a, an hnufualna nasa takin pawt zim mah se a tawpah a team a chakpui zo ta lo a ni.

Bucks hian season bul an ṭan fuh lo hle a, an match hmasa 10 aṭangin vawi hnih chiah an chak - tun hnaiah erawh an insiamṭha ta. An match hnuhnung panga aṭangin vawi li an chak.

Inkhel dangah Cleveland Cavaliers chu an tho chhuak leh nghal, an match hmasa zawkah tun season atana an chak lohna hmasa ber tawng mah se Cavs hi New York Pelicans lakah 128-100 in an chak leh nghal a ni.

Cleveland coach Kenny Atkinson chuan, "NBA huangah chuan match tin mai hi a awlsam lo a, point 20 chuanga hnehna chan theih phei chu a ropui hle. Kan chak loh hnua kan thawhchhuah leh nghal dan hi a ropui lai chu a ni bawk," a ti.

Western Conference hmahruaitu Golden State Warriors pawh an chak. Warriors hian Andrew Wiggins (27 points) leh Stephen Curry (23) te hmangin Atlanta Hawks chu 120-97 in an hneh a, anmahni khelmualah a zawnin match nga an chak.