Spurs-in an player hrem an khinglet

Tottenham Hotspur chuan an midfielder Rodrigo Bentancur an hremna chu na lutukah an ngai a, match sarih ngawt inkhel thei lo tura an hremna chu Football Association (FA) hnenah an khinglet.

Uruguay international Bentancur hian an rama TV pakhatah, Spurs tana a khelhpui Son Heung-min chungchang a sawi a, South Korean ho chu an hmel inang veka a hriat mai thu a sawi.

Hei hi chi leh chi inthliarna rawngkaia ngaih a ni a, player pahnih Bentancur leh Son-a te hi inhaw zui lem lo mah se, thuneitu lamin an bawhzui ta tho - England rama football thuneitu sang ber chuan hremna hi a ti chhuak.

Spurs chuan thuchhuah siamin, "Rodrigo Bentancur khan thil a tisual tih kan pawm a, a hnua ngaihdam a dilna leh Son nen an inkar a ṭha tih pawh kan hria, hrem a nih dan erawh a uchuak hle niah kan ngai thung," an ti a, an player hremna chu tinep turin an ngen bawk a ni.

Hremna hi a pangngaia an kaltlang pui a nih chuan Premier League match pawimawh tak tak a khel thei dawn lo, a hmachhawn theih loh tur zingah Manchester City, Liverpool leh Chelsea te pawh an tel - Manchester United nen League Cup semifinal an khelh hunah a inlan thei lo bawk ang.