Sindhu leh Sen-a an chak phawt

China Masters Super 750 badminton tournament khelh ṭan a ni a, champion beisei ngam zinga mi PV Sindhu leh Lakshya Sen te chuan an match hmasa berah hnehna changin second round an inhlangkai.

Olympic medal vawi hnih dawng tawh Sindhu hian Busanan Ongbamrungphan lakah awlsam takin hnehna a chang mai bik lo, minute 50 an inkhelh hnuah India nula hi 21-17, 21-19 in a hneh.

Thai nula Ongbamrungphan nen hian vawi 21 an intawng tling ta a, ṭum 20 tehmeuh chu Sindhu hian hnehna a chang, a match lehpekah chuan Singapore mi Yeo Jia Min a tum leh dawn a ni.

Mipa singles huangah Lakshya Sen-a chuan minute 57 chhungin Lee Zii Jia chu 21-14, 13-21, 21-13 in a hneh. Player pahnih hian Paris Olympic bronze medal kha an lo inchuh tawh a, tun ṭumah chuan result inthlakin Sen-a a chak ta zawk.

Doubles lamah Satwiksairaj Rankireddy leh Chirag Shetty te pawhin hun rei tak hnuah match an khel ve leh ta a, an khingpui Lee Jhe-Huei leh Yang Po-Hsuan te inkawp chu 12-21, 21-19, 21-18 in an hneh, chak tur hian darkar khat leh minute ruk lai hun an mamawh.