Ruben Amorim hun a inṭan

Manchester United chuan November 24, Pathianni zan dar 10:00 hian Ipswich Town FC an tlawh dawn a, Portman Road aṭangin Portuguese manager Ruben Amorim-a'n Red Devils enkawl hna a ṭan ang.

Premier League-ah Man United hi 13-na chauhah awm mah se dinhmun chhe lailet erawh an ni lo. Ruud van Nistelrooy hoa result an neih chhiat loh avangin point 15 an hmu a, pathumna Chelsea chu point li chauhin an pha lo.

Amorim-a hi 'The New Mourinho' hming lem an pek a ni a, Old Trafford-ah Sporting Lisbon-a a hlawhtlinna chhunzawm a tum ang. Portuguese manager hian Lisbon hi league nomawi pahnih a chawipui a, chu aia an ngaihven tur erawh a player-te a khelhtir dan a ni.

Tlarhnungah Amorim hian player pathum a hmang ṭhin a, Manchester United-ah pawh defender pathum tho a chhawr tura ngaih a ni a, wing back pahnih a chhawr bawk dawn. United-in khelh dan phung thar an nei dawn a, Ipswich laka an khelh dan tur hriat a châkawm tawh takzet.

Erik Ten Hag-a'n 4-2-3-1 formation a hmang ṭhin a, Amorim-a'n 3-4-2-1 a hman a rinawm thung. Chutihrualin Ten Hag-a hman ṭhin defender pali erawh an lut thei a, an khelh dan hmang a dang hret thung ang.

Defence lai pathumah Lisandro Martinez leh Matthijs de Ligt te tan hmun a awm rinawm a, pathumna tur erawh rin thiam a la har. Player thar Leny Yoro a dam ṭhat tawh chuan bul a ṭan thei ang a, chutiang bawkin Luke Shaw pawh wing back angin a hman thei ang.

Shaw leh Yoro te an la dam chiang lo a nih chuan Noussair Mazraoui leh Diogo Dalot te tan hmun a awm thei ang a, Amad Diallo pawh wing back angin a chhawr theih hial ang.

Tlarhmaah Rasmus Hojlund chu bul ṭan ngei tura ngaih a ni a, captain Bruno Fernandes leh Alejandro Garnacho te an pawimawh dawn. Midfield-ah Manuel Ugarte, Casemiro, Christian Eriksen leh Kobbie Mainoo te an dam ṭha vek a, Mainoo leh Ugarte te chu bul ṭan thei dinhmunah an ding.

Man United ṭantuten Ruben Amorim hnuaiah beiseina an nei sang a, khelh dan phung thar an beisei a, hei vang tak hian Ipswich laka chiang taka hnehna an chang a nih loh chuan an hnual ang. Amorim-a'n Old Trafford hi a awmna hmun tur tak a nih thu a sawi a, United ṭantute thlawpna a duh chuan result ṭha nena bul ṭan a pawimawh dawn.