Alexander-Arnold leh Alisson inlan thei lo

Liverpool boss Arne Slot chuan Pathianni zan dar 7:30-a Southampton an lenchilh hunah goalkeeper Alisson leh tun hnaia inhliam, full back Trent Alexander-Arnold te an inlan theih loh tur thu a sawi.

Slot chuan, "A bik takin player-in tihrawl hliam an neihin kan fimkhur ṭhin. Alisson-a'n goalkeeper-te nen training an nei leh thei tawh a, team nen erawh a la nei thei rih lo thung - hma a sawn zel a, mahse, Pathianni zana inlan tur erawhin a la inpeih lo," a ti.

Dutch coach chuan Aston Villa an hneh ṭuma inhliam Trent Alexander-Arnold chungchang sawi zuiin, "Trent hi a la training ve thei rih lo a, Diogo Jota leh Federico Chiesa pawhin kar rei vak loah chuan min zawm theih kan beisei," a ti a, hetihlai hian captain Virgil van Dijk erawhin club training a zawm theih thu a sawi.

Slot-a hnuaiah Liverpool hian beisei phak baka ṭhain season an hmang mek a, league match 11-ah vawi khat chiah la tlawmin, hma an hruai mek a, anmahni hnaih bertu Manchester City aiin point ngain an sang zawk.

Champions League lamah match li khel tawhin an chak vek a, hma an hruai bawk. November 27, Nilaini zan dar 7:30-ah Real Madrid an mikhual zui dawn a, Saints lakah Slot-a'n a player langsarte a hahdamtir a nih pawhin a mak lo ang.