Pathianniah Las Vegas Grand Prix: Champion thei dinhmunah Verstappen

Car intlansiakna sang leh ngaihhlut hlawh ber Formula 1 chu Pathianni chawhma dar 11:30 hian tlan a ni dawn. Las Vegas Street Circuit-ah Las Vegas GP an tlan dawn a, khawvel milar an fuan khawm leh ang.

Tun kartawp intlansiakah hian, driver championship lama hmahruaitu Max Verstappen chu champion thei dinhmunah a ding a, chutihrualin a kutah a la innghat vek bik lo, midang ngaihchan tel a la ngai.

Las Vegas bakah hian Qatar leh Abu Dhabi GP te a la awm dawn bawk a, tun season atan intlansiak pathum a la awm tihna a ni - Red Bull driver hi a chesual viau a nih ngawt loh chuan a zawna a vawi li nan a champion ang.

Norris a fimkhur

Season tir lam khan Red Bull leh Verstappen chu tuma dan theih lohin an kal fal. Max-a hi amah hnaih bertu Lando Norris aiin point 84 tehmeuhin a kal fal hman a, nuamsa taka champion tur angin a lang hman.

Mahse, McLaren driver Norris hian season chawhnu lam a hmang ṭha, a hmaa awm Max nen an inkar chu point 47-ah a sawr zim thei a, hma taka champion thei tura ngaih Verstappen chu a chelh khawtlai rei ta hle.

Las Vegas GP-ah hian Verstappen a la champion loh nan chuan, pahnihna ni mek Norris hian a tlem berah point thum tal a hmuh belh a la ngai, ni danga a tlan dan ngaihtuah chuan thil harsa a ni hran lo ang.

Norris chuan, "Red Bull leh Max te hi theihtawp chuan ka um ngei mai a, kan tih theih anga ṭha chuan kan tlan. Mahse, tuna a lan dan chuan, anni tlan pel tur chuan hun a tlem deuh tawh niah ka ngai tawh.

"Chutihrualin kan beidawng tihna erawh a ni lo a, a tawp thlengin kan bei dawn a ni. Tun hnaiah nasa takin hma kan sawn a, champion lai leh hmahruaitu kan elphak hi thil lawmawm lam a ni zawk," tiin a sawi.

Intlansiak hnuhnung ber Brazilian Grand Prix-ah khan Norris hi parukna a ni a, a elpui Verstappen erawh a hmasa berah a thleng thung, an beiseina chhi nung zel turin McLaren driver hian chak a tum ruh khawp ang.

Max a harh

Kum tluana chetṭhat reng theih a ni lo a, chet fuh leh tlak hniam lai neih chu mihring zia a ni. Max Verstappen pawhin boruak inang lo chi hnih a tawng ve tho, season tawp dawn hun pawimawhah erawh a zia tak tak a lantir.

Brazil rama intlansiakah khan che fuh lo ni se la chuan Max leh Red Bull chunga rinna nghah huai a harsa mai thei a, an zuih zel dawn emaw tihna pawh a lian hman ang, mahse a hunah tak a chak thei tlat.

Dutch tlangval Verstappen chuan, "Intlansiaka hnehna changtu nih kan duh a, champion nih kan duh a nih chuan kan theihna chin tawk kan hriat a ngai a, chumi mila kan chet thiam chu a pawimawh.

"A nihna takah chuan a tir aṭanga a tawp thlenga pakhatna nih vek mai chu thil theih a ni lo tih hi la chiang, a pawimawh zawk chu tlak hniam deuh hnu pawha thawhchhuah leh theih hi a ni.

"Kei chuan theihtawp ka chhuah reng a, intlansiak hnuhnung zawk aiin engtin nge ka tihṭhat lehzual theih ang tih hi ka ngaihtuah reng ṭhin bawk, chesual loa tlan tluan theih hi a pawimawh," tiin a sawi.

Max Verstappen hi a champion leh a nih chuan, car intlansiakna sang berah hian a zawna vawi li champion thei hmasa ber a ni ang. Kum 2010-2013 khan Sebastian Vettel chu Red Bull car khalh chungin vawi li a lo champion zawn tawh bawk.