Vawi li kan tlawm vangin ka cham - Pep

Pep Guardiola chuan Manchester City enkawl chhunzawm turin contract thar a ziak ta a, City lam pawhin official takin an puang tawh - media lamin kum khat cham tur anga an sawi erawh a dik lo a, kum hnih dang a cham dawn.

Spanish coach hian kum 2027 thleng City hi a enkawl dawn tihna a ni a, Premier League club dang tan hriat a nuam lo ang. Pep chuan, "Chhuak thei mai dinhmunah ka ding hman a, mahse, a zawna vawi li kan tlawm vang khan cham turin thutlukna ka siam leh ta a ni mai thei," a ti!

Pep hian City hi inelna hrang hranga an match hnuhnung paliah a tlawmpui a, Barcelona coach hlui tan penalty chhiar tel loah heti zat a zawna a tlawm hmasak ber a ni. Spanish coach a tlawmngai a, a tihsual siam ṭha a, a ṭha thei ang bera City chhuahsan a duh.

Manchester City hian Premier League-ah hmahruaitu Liverpool chu point ngain an phak lo mek a, match 11 an khel tawh. Zanin dar 11:00 hian Tottenham Hotspur an mikhual zui dawn a, Pep-a'n chak result nen a contract thar lawm a duh dawn.

Thawh a hun

Pep chuan, "Match li zet a zawnin kan tlawm a, hei hi siam ṭha a, kan dinhmun her danglam hi kan phu a ni. Heng zawng zawng ka sawi chhan hi ka chapo vang a ni lo a, thudik ka sawi mai zawk a ni," a ti a, a inringtawk hle.

Spanish coach chuan tun dinhmuna harsatna an tawh mek chu kalsan tura inpuahchah an mamawh thu a sawi a, a naute chu tho leh tura inbuatsaih turin a duh. Pep chuan, "Kan insiamṭhat vat a ṭul - chu chu kan tum ber pawh a ni," a ti.

Pep-a kaihhruaina hnuaiah City hian nomawi 18 zet an chawi a, heng zingah hian Premier League nomawi paruk ngawt telin, Spanish coach an neih hmaa an champion ngai lohna Champions League-ah nomawi a chawipui bawk.

Kum 2016 khan Pep hian City hi a zawm ve chauh a, Manchester khaw club a zawm hma hian Barcelona leh Bayern Munich a lo enkawl tawh bawk - thutlukna a siam hma khan England FA pawhin an dawr a, mahse, City enkawl chhunzawm turin thutlukna a siam ta.

Hmun duhawm

Pep chuan Etihad Stadium chu a tan hmun nuam leh duhawm bik a nih thu a sawi a, City a enkawl thei chu a tan a hlut thu a sawi. Spanish coach chuan, "He club ka enkawl thei hi ka lawm takzet a, manager tawh phawtin an duhthusam theih ang chu he hmunah hian a awm vek a ni," tiin a sawi.

Kum 53 mi coach chuan sawi zawmin, "City-ah hian season kua zet hun ka hmang ta a, hun hlimawm tam tak pawh kan tawng ho a ni. He club hian ka thinlungah hmun pawimawh tak a chang," a ti a, English club hi enkawl nuam a ti hle.

Pep chuan nomawi chawi belh an tum tur thu sawiin, "Tunah chuan nomawi kan chawi tawhte khan kan belhchhah theih ka beisei a, chu chu tunah chuan kan tum ber a ni," a ti - hlawhtlin châkin a la tuihal reng.

Pep-a hnuaiah City hian league nomawi paruk, FA Cup (2), League Cup (4), FA Community Shield (3), Champions League (1), UEFA Super Cup (1) leh FIFA Club World Cup (1) nomawi an chawi a, Spanish coach record hi a ropui hle.

City an lawm

Mi tam takin khawvela coach hlawhtling ber ang hiala an ngaih Pep-a'n City-a cham a thlang a, Manchester khaw club hi an lawm hle - lawm tur pawh an ni! City chairman Khaldoon Al Mubarak chuan, "City fan tam tak ang thoin Manchester City-a Pep a cham zel tur hi ka lawm hle.

"A inpekna, tuina, game thlak danglam tura thil thar ngaihtuah chhuah kawnga a ngaihtuahna a sen nasat takte chu he club tan hian a hlan zel thei dawn a ni," a ti a, Spanish coach-in khawdang hawi loa an hnena cham a thlang chu a lawm takzet.

Pep chuan, "Hmasawn zel a duhna leh, hlawhtlin zel a tumna hi ropui tak a ni - chu a duhna hlawkpui tur chu player leh coaching staff, he club leh English game hi a ni dawn a ni," a ti a, Pep-a cham chu club tan chauh ni loin English football tan a ṭhat thu a sawi.

Guardiola kaihhruaina hnuaiah City hi English top flight league-a a zawna vawi li champion thei hmasa ber an ni a, Premier League-a point 100 hlawh chhuak thei hmasa ber an ni bawk - City fan-te u, hlimin lam phawt mai teh u!