Foxes mualah Maresca a kir dawn

Zanin dar 6:00 hian Chelsea chuan Leicester City hmachhawn turin King Power Stadium an lenchilh dawn a, coach Enzo Maresca chu a club hlui hmachhawn turin Foxes mualah a kir dawn tihna a ni.

Italian manager Maresca hian tun hmain Parma leh Leicester City hi a lo enkawl tawh ṭhin a, chumi hnuah Stamford Bridge a pan - Blues hi a dinthar leh mek a, zaninah pawh mikhual team ni mah se chak tura rinkai zawk an ni ang.

Kum 44 mi Maresca chuan, "King Power-ah khan hun nuam leh hlimawm tak ka lo va hmang tawh a, ka tan chuan theihnghilh theih a ni tawh lo ang, club neitu, player leh fan-te ka chungah an ṭha em em vek.

"Tun dinhmun ka thlen theih nana rahbi min tuksaktute an ni a, ka tana an hlut dan chu sang ta a ni. Zah tak chungin ka lut dawn a, ka team Blues chu hnehna chanpui ngei tumin ka hruai thung ang," tiin a sawi.

Maresca naute hian Premier League match 11 aṭangin point 19 an hmu a, pathumna ni mekin an chungah Manchester City leh Liverpool chauh an awm.