Mikel Arteta tan match pawimawh

Premier League an khel chhunzawm leh tawh dawn - Arsenal chuan zanin dar 8:30 hian Nottingham Forest an mikhual ang. Mikel Arteta-a'n Gunners a enkawl aṭanga match 250 a tlinna tur chiah a ni.

Spanish manager hian Arsene Wenger-a chhuah hnuah North London team din thar leh a tum a, a theihtawpin hma a la. A tir lam match 250 chin chhut chuan Arteta hi Arsenal manager zinga chak tam ber (58.6%) a ni a, an manager ropui Wenger ai khan vawi 10 zetin a chak tam.

Arsenal manager zingah Arteta hi match 250 kaihruai tling thei 10-na a ni a, tun ṭuma Forest nen an inkhelh hunah hian kum 42 leh ni 242 mi a ni ang, hetiang thleng tur hian naupan lamah George Morrell leh Leslie Knighton te chauh tluk loh a nei.

Arteta tan match pawimawh a ni a, a pawimawh zawk erawh tun hnaia an result ṭha tawk lo tak aṭangin a tho chhuak thei ang em, tih a ni zawk. Gunners hian EPL match an khelh hnuhnung paliah chak ni hmel an hmu miah lo.

Forest nen an inkhelh hnu lawkah Champions League khel tura an zinchhuah leh nghal a ngai dawn a, chumi hnua lo hmuak tur chu West Ham leh Manchester United te an ni zui leh ang.

Tun hnai season hnih chhung chu Arsenal hian Premier League nomawi a chawi teuh ṭhin khawp mai, mahse 'teuh' chu an thlen chin a ni ṭhin. Kuminah Manchester City an chesual nasa a, mahse Liverpool chauh ni loin an chungah Chelsea pawh an awm tel.

Arteta enkawl Arsenal hian champion an duh takzet emaw, champion turin an ṭha tawk takzet emaw a nih chuan chetsual a remchang tawh lo. An tho chhuak mai lo a nih chuan thlasik boruak vawt lutuk tawn hmain an champion beiseina a thamral daih thei dawn a ni.