Barcelona an tho thei dawn em?

La Liga hmahruaitu Barcelona-in international break hmaa an match hnuhnung berah Real Sociedad an hmachhawn a, rin loh takin an tlawm - an mikhualna ramah 1-0 in an chak lo a, tun season-a an tlawm vawi hnihna a ni.

International break-in a zui a, Catalan club-in chak loh hnuah hahdamna hun ṭha leh insiamremna hun an nei a, zanin dar 1:30 hian Celta Vigo chu khualmualah an lenchilh ang - Hansi Flick leh a nauten insiamṭhat nghal an tum dawn.

Barca hi Real Madrid-in an um zui ve reng a, team pahnih inkarah point ruk la awm mah se, Real Madrid aia an sanna chu point ruk chauh a ni tawh a, match khatin an khel tam zawk bawk.

Chumi awmzia chu Real hian vawi khat chakah point thum lekin Barca an thlau thei tihna a ni a, Catalan club tan chetsual loh a ngai - Real Madrid hian Pathianni zan dar 11:00-ah Leganes chu khualmualah an lenchilh ang.

Yamal tel lohna

Barcelona tan an match hnuhnung berah hliam vangin Lamine Yamal a inlan thei lo a, kum 17 mi forward tel loin Barca goal nawr a na tawk lo - zaninah pawh Yamal hi a la inlan thei dawn chuang lo a, rawlthar player tel loa khelh ṭhat an zir a ṭul.

Hetihlai hian Ferran Torres hliam a dam tawh a, a inlan thei dawn. Mahse, Yamal a inhliam chungin Hansi Flick-a'n bul ṭantir nan hma a la tihretin a rinawm a, chuti a nih chuan tlarhmaah Dani Olmo, Robert Lewandowski leh Raphinha te inkawp tura beisei an ni.

International break-ah hliam vangin Lewandowski a feh chhuak hman lo a, mahse, Ningani khan training a zawm leh tawh avangin Polish striker hi inlan thei tawh tura beusei a ni - Lewy hian tun season inelna hrang hrangah match 17 khelin goal 19 a khung leh der tawh.

Raphinha pawhin a career-a season duhawm bera chhal ngam a hmang mek a, Brazilian forward hian tun season-ah match 17 khela goal 12 khungin, assist vawi 10 a nei a, dan a harsa hle. Mahse, Celta hian Osasuna leh Sociedad ten Barca hi an hneh tawh tih an theihnghilh bik lo ang.

Beiseina neitu Celta

Celta Vigo-in league match 13 khelh tawhah vawi nga chiah chak an la nei a, vawi hnih an khingpui inhnehtawkpuiin, vawi ruk ngawt an tlawm - an match hnuhnung berah Real Betis chu 2-2 in an inhnehtawkpui bawk a, bul an ṭan ṭha lo.

Mahse, Catalan club tan veteran striker Iago Aspas theihnghilh a thiang lo. Spanish striker hi kum 37 ni tawh mah se, a rintlak dan a la ngai reng a, league match 12-a khelh tawhah goal li khungin, assist vawi thum a nei.

Hei chauh hi a ni lo - La Liga-a Celta Vigo leh Barcelona an intawnin goal 11 ngawt a khung tawh a, club pahnih intawna goal khung tam lama a tluk loh awmchhun chu Lionel Messi chiah a ni. Spanish striker hian Barca a ngam tlat.

Zaninah pawh Liverpool striker hlui hian Barca tan mangchhia thlen tumin khelmual a lut dawn a, zaninah Catalan club hi an hneh a nih chuan Barca tlawm thu hre sain Real an inlan ang a, La Liga boruak a 'hot' lehzual sawt ang.

Khawiah maw Real?

Pathianni zan dar 11:00-ah Real Madrid an inlan dawn a, khualmualah Leganes an lenchilh ang - Carlo Ancelotti naute tan Barca um phak an tumna kawnga match pawimawh a nih rualin, Nilaini zan Champions League-a Liverpool an lenchilh tur atana inpuahchahna pawimawh tak a ni tel.

Real hian tun season Champions League-ah beisei an phak lo a, match li an khelh tawhah vawi hnih chiah an la chak! Vawi hnih an tlawm a, team 36 inelnaah 18-na an ni mek a, last 16 lut nghal lo thei dinhmunah an ding mek.

Ancelotti-a'n he inkhel tur hi a thlir ran ang a, player inhliam a neih nual bawk avangin Liverpool tana inpuahchah nan Leganes nena an inkhel tur hi a hmang thei ang - Rodrygo a inhliam avangin a aiah Brahim Diaz a luh a ṭul dawn.

Real hi tlarhma an la inrem fuh thei lo a, Kylian Mbappe-a'n beisei a la phak lo a, French striker awm hnuah Jude Bellingham a talbuai bawk - Pathianni zanah Real tan Liverpool hmachhawn turin an inpeih tih pholan a ṭul.