Milan mualah Juventus

Zanin dar 10:30 hian Serie A inkhel pawimawh leh hmuhnawm a awm dawn - AC Milan leh Juventus te chu San Siro-ah an intawng dawn; Italian champion nih tum pahnih an nih avangin inkhel boruak a sang ang.

Milan hian an elpui team lian dangte aiin match khatin an khel tlem zawk a, khel kimin chak ni se la chuan an dinhmun a la chhe lo. Chuvangin an tan Serie A nomawi beisei ngam a la ni a, elpui team hneh theitu nih an tum dawn.

Thiago Motta enkawl Juve tan thil a awlsam dawn lo, a striker ṭha ber Dusan Vlahovic chu hliam vangin a inkhel thei dawn lo. Arkadiusz Milik, Nico Gonzalez, Juan Cabal leh Gleison Bremer te pawh an hliam vek, Douglas Luiz dinhmun a chiang lo bawk.

Old Lady manager Motta chuan, "Hliam hi chu infiamna ken tel a ni a, kan player pawimawh tel loa match pawimawh kan khel tur hi a pawi ka ti, chutihrualin midang tan kawng a inhawng tihna a ni ve bawk," tiin inchinfel theih a beisei.

Zan tir lamah Inter Milan an inlan dawn a, champion lai Inter hian Hellas Verona an lenchilh ang - Inter hian point 25 hmuin palina an ni mek a, hmahruaitu Napoli an phak lohna erawh point khat chauh a ni thung.

Antonio Conte kaihhruai Napoli chuan Pathianni zanah AS Roma an mikhual dawn thung a, anni tan pawh an hmahruaina vawng nung turin point khat lek hloh pawh a rem dawn bik lo a ni.

Tun kartawp inkhel ngaihven hlawh tur zingah Napoli leh Roma inkhel tur hi a tel. Claudio Ranieri-a'n a vawi thum nan Roma a enkawl a, season an hman ṭha lo tak siamṭha thei tura an ngaih a nih avangin Italian manager lakah beisei an nei sang ang.