LeBron leh Cavaliers-in NBA Final an thleng

Eastern Conference final-ah Game 4 thleng bak khelh a ngai lo. Nimin zing khan Quicken Loans Arena, Cleveland-ah Cleveland Cavaliers-in Atlanta Hawks 118-88 in an hneh a, NBA Final an thleng.

Game 1 aṭangin Cleveland Cavaliers an chungnung a, Game 4 quarter hmasa ber tawp lamah Cavs hian 24-14 in hma an hruai a, hun tawp thlengin harsatna an nei tawh lo. Tun hi 2007 hnua Cleveland-in final an luh lehna hmasa ber a ni a, final ṭum hnih an luhna chauh a ni.

King James

Cavaliers thiampuipa LeBron James chuan point 23 a score a, rebounds pakua lain, assists vawi sarih a nei. King James hian kum nga chhung a zawnin NBA Final a lutna chiah a ni. Boston Celtics player engemawzatin kum zawnin vawi nga an lut tawh a, amaherawhchu James chiah hi club pahnih tana final vawi nga a zawna lut thei a ni.

Cavs-in series 4-0 a an lakna kawngah James hi a pawimawh hle a, Eastern Conference final-ah hian chawhrualin James hian point 30.1 a score a, rebounds vawi 11 leh assists vawi 9.3 zel nei ang a ni.

Irving a kir

Khup hliam vangin Cavs guard Kyrie Irving chuan match hnuhnung pahnih a khel lo a, Game 4-ah starting five rawn changin minute 22 chhung a inlan a, point 16 a score hman. A chet vel danah ngai a awh tawh tih a lang a, Cleveland-in NBA Final an la khelh turah Irving hian mawhphurhna tam zawk a la thei ang.

Hawks vanduaina

Atlanta Hawks hi East lam seeed no. 1 an ni a, regular season-ah vawi 60 an chak a, All Stars pali Al Horford, Kyle Korver, Paul Millsap leh Jeff Teague an nei a, coach of the year Mike Budenholzer an nei bawk.

Amaherawhchu Game 1-ah DeMarre Carroll-a'n a khup a ti hliam a, Game 2-ah Kyle Korve a inhliam leh a, Millsap leh Horford ten 100% fitness in an khel thei lo a, Thabo Sefolosha a tel thei lo bawk.

Hei vang hian Hawks-in an game pangngai an pha lo a, Eastern Conference final-ah three points aṭangin vawi 111 shot-ah vawi 26 chiah an lut. Regular season-a an record nen chuan inthlau tak a ni.

Hmabak chu

Tukin zing dar 6:30 hian Houton Rockets leh Golden State Warriors te Oracle Arena, Oakland-ah an inkhel dawn. Series 3-1 a hmahruaitu Warrior tan Cleveland hmachhawn turin vawi khat chak chiah a ngai tawh.

NBA Final hi June 4-ah Game 1 khelh tur a ni a, Western Conference champion home aṭanga bul ṭan tur a ni.