FIFA remruat dan sawiseltu Wenger
Arsenal manager Arsene Wenger chuan FIFA-in nipui chawlh hun chhung a ruahman chu rei lo a tih thu leh FIFA chuan player te hriselna ngaihtuah tawk loah a puh.
Arsenal hian Pathianni zan khan tun season Premier League an match hnuhnung ber chu West Brom nen Emirates Stadium-ah khelin 4-1 in hnehna an chang. May 30 khian Aston Villa nen FA Cup final an la khelh dawn avangin an season ala tawp ve lo.
June 11 aṭangin Copa America khelh ṭan leh nghal tur a nih avangin Colombia keeper David Ospina leh Chile forward Alexis Sanchez te chuan chawlh pawh nei hman loin an ram lam an pan nghal a ngai ang.
French manager Wenger chan,"FIFA remruat dan hi fuh tawk lo lai deuh chu a awm chiang a ni. Nikum FIFA World Cup hnu khan Sanchez hian Arsenal tan match 59 a khel tling leh tawh a, tunah chawlh pawh nei hman loin tournament dang a khelh leh a ngai bawk si. Tournament hi a tam lutuk deuh a ni," tiin a sawi. Nikum Brazil World Cup zawh hlim khan Wenger hian tournament hi tam lutka a hriat thu a lo sawi tawh bawk.
Copa America hi July 4 thleng khelh tur a nin avangin player te tan chaun chawlh hahdam na hun a awm dawn lo hle. Premier league season thar hi kum dang aiin khelh ṭan hma tur a ni dawn a, August 8 aṭanga khelh ṭan leh nghal tur a ni ang.
Kum 65 a upa Wenger chuan, "FIFA hian player te taksa hriselna pawh hi an ngaihtuah tawk loin ka hria. An phak tawk aia tam inkhelh an ngaih chuan an taksain nasa takin a tuar vat dawn. Chuvangin FIFA hian hei aia ruahmanna ṭha zawk a duan chhuah a hun a ni," tiin FIFA chu kalphung thar ngaihtuah chhuak turin a duh hle.