Ostrava-ah Bolt a inlar

Kumina a vawi khat nan Europe-ah Usain Bolt a intlansiak leh ta a, Ostrava-a Golden Spike meet neih mekah 200m-ah pakhatna a ni.

Thawhlehnia intlan­siakah hian Bolt hian second 20.13 chhungin 200m a tlan thlengin pakhatna a ni. Mahse, ama record lo siam tawh second 19.19 chu a tluk lo a ni. Pahnihnaah American Isiah Young a thleng bawk.

Jamaican spinter Bolt hian Olympic gold medal paruk a la tawh a, 100m leh 200m-ah te Woeld record siam tu a ni bawk. Kumin August thla aṭanga ṭan tur Beijing IAAF World Championships atan a inbuatsaih chho mek a ni.

Kum 28-a upa Bolt chuan, "Khua a hnawng­in a vawt em em a, intlansiak a harsa hle. Pakhatna ni mah ila ka duhthusamin ka la tlan lo. Second 20.13 chhunga tlan thlen kha a chhe hran lo a, mahse kha aia ṭha zawk khan ka la tlan thei a ni," tiin a sawi.