City, United leh Arsenal ngam loh Mourinho
Premier League-ah Chelsea an champion a, tun season bika coach ṭha ber chu Jose Mourinho a ni.
'The Special One' hming lem invuah Mourinho-a'n khelmuala game plan a thiam zia a lantir hnuah Chelsea-in Player of the Year awards sem zanah ṭawngkam a thiamzia a phochhuak.
Award sem zan hian Jose Mourinho-a'n a zia a chhuah a, Louis van Gaal, Arsene Wenger leh Manuel Pellegrini te chu fiamthu thawh nan a hmang.
Portuguese coach Mourinho chuan, "Season ṭan tirh aṭanga a tawp thlengin ka player-te'n an phu ang fakna an dawng lo. He thu hi ka ngaihdan dik tak a ni a, amaherawhchu tunah chuan thawnthu ngaihnawm tak sawi tur ka nei a, kan hlimpui ngei ka beisei," a ti.
Screen lianah Chelsea-in 2-0 a Manchester United an hneh ṭum lam hawi milem chu a rawn lang a, Mourinho chuan sawi zuiin, "He inkhel hi goal hnih luhna inkhel a ni a, team pakhat zawk hi ball tel loa inkhelh duh an ni. Team pakhat chuan ball chu an inpe kual vak vak a, an ball possesion pawh a ṭha a, mah se goal an khung loh avangin point an hmu lo. FIFA committee hnehah an thlen a, point an hmuh thei em tiin an zawt a, a theih loh thu an lo hrilh. Ball possession ngah ringawt chu chak nan a tawk lo a, an champion lo," tiin Louis Van Gaal-a hote chungchang a sawi.
Mourinho chuan Manchester City lam a hawi a, Chelsea hi City aiin an defensive record a ṭha zawk. Premier League champion coach chuan, "Team pakhat (kawr pawl dal ha) an awm leh a, a hmaa ka sawi khan khelh dan phung nget an nei. He team inkhelhah hi chuan goal pakhat chiah a awm a, mawi takin an khel a, position tin aṭangin goal ṭhahnem tak an khung a. Goal an chhuah ve lo, a chhan chu goal an neih loh vang a ni. FIFA hnehah an kal a, mahse thuneitute chuan football chu goal pahniha khelh ṭhin a nih avangin an champion pha lo tih an lo hrilh," tiin City chu ngeiawm takin a deusawh.
Manchester City hian season khelh zawh takah khan goal 83 an khung a, goal 38 an chhuah a. Chelsea-in goal 73 an khung a, goal 32 an chhuah. Mourinho sawi awmzia chu City hian tlar hnung ngaihtuah lek loin an attack a tihna a ni. Real Madrid coach hlui hian anmahni aia goal chhuah hnem chu a nuihzat hle.
Arsenal-ah ṭuan zuiin Portuguese coach chuan, "Team pathumna erawh chuan goal hnih awmin an inkhel a. Goal an khung a, goal an chhuah ve bawk. Goal nalh tak takin an khung a, amaherawhchu bus a rawn kal a, goal an khung thei tawh lo," tiin Arsene Wenger hote'n Chelsea tlar hnung an sut tlang theih loh thu a sawi.
A tawpah Chelsea chungchang sawiin Mourinho chuan, "Team pakhat erawh chuan dan pangngaia inkhelh an duh a, an khingpui aia goal khata an khung tam chuan an chak thei tih an hria. Ka team sawi hnuhnung ber chuan goal an khung ṭheuh chuan tlem a zawng an chhuah a, goal khat chauh an khung chuan an chhuah lo. August aṭanga May thla chhungin goal an khung a, an chhuah a, a ṭul hunah chuan bus an lei bawk," tiin an khelh dan chu a fak mawi thiam hle.