Italy-ah intlansiak a hautak dawn - Marquez
Repsol Honda rider Marc Marquez chuan tunkar tawp a Italy a intlansiak an neih tur chu a hautak dawn hlea a hriat thu leh tun season intlansiak lo awm leh tur zawng zawngah inthlahdah a thian loh thu a sawi.
Marquez hi MotoGP World champion nilai a ni a, mahse tun season-ah beisei angin a tlan ṭha tawk lo. Driver championship-ah point 69 hmuin palina a ni mek a, tun dinhmunah Valentino Rossi, Jorge Lorenzo leh Andrea Dovizioso te a tluk lo mek. A champion nomawi humhim tur chuan a beih nasat a ngai tawh dawn hle a ni.
Spanish Grand Prix-ah khan pahnihna niin beiseina nei sang viau mah se French Grand Prix-ah erawh palina a ni leh thung. Italian Grand Prix hian championship-a a dinhmun tur a hril thui tawh hlein a rinawm. An intlansiak na tur Mugello-ah hian intlansiak class chi thum Moto2, 125cc leh MotoGP-ah te pakhatna a lo nih vek tawh avangin beiseina a nei sang hle.
Kum 22-a upa Marquez chuan Italy Grand Prix thirlawkin, "Beisei angin season ṭan fuh lo mah ila tunah hian beisei bo ka la ni bik lo. Italy hi Rossi te ram anih avangin ani hi a huphurhawm ber a ni ngeiin a rinawm. Ani bakah hian Jorge Lorenzo leh Dani Pedrosa te pawhin he hmunah hian hnuhma ṭha tak an lo neih tawh avangin an tawh a khirh hle bawk ang. Ducati pawhin hmanni lawk khan test drive an lo neih tawhna hmun a nih avangin tun kartawp intlansiak chu a harsain a ngaihnawm hle ang," tiin a sawi.