Coach ban hi thutlukna dik a ni- Casillas

Real Madrid-in Thawhṭanni khan an manager Carlo Ancelotti an ban a, ni hnih hnuah captain Iker Casillas chuan manager chung­changa a ngaihdan a sawi chhuak.

Spanish keeper Casillas chuan, "Kan club hian hlawh­tlinna kan duh takzet a. President leh board ten thutlukna dik an siamah ka ngai. Carlo chungah hian nikuma lama min khelh tir loh avangin ka lungawi lo a, chutihrualin ka chunga a hnathawh avangin a chungah ka lawm a ni. Pa ṭha tak a ni a, Madrid-ah hian engtik hunah pawh tlangnel takin a rawn kir thei ang," tiin a sawi.

Italian manager hmalam hun chu a chiang tawh a, Casillas chungchang erawh a la chiang lo. Real Madrid leh Manchester United keeper David de Gea an sawi zawm a, an la lut a nih chuan kum 34-a upa Iker Casillas tan khelhna hmun chan a harsa sawt ang.

Hemi chungchang hi sawiin Casillas chuan, "Season thara Real tana khelh zel hi ka duh a ni. Real kawr ha loa season thar awm turin ka inngaihtuah thiam lo. Chutihrualin thil a kal fuh lo a nih chuan chhuah a ṭul thei a, tun dinhmunah chuan club-ah hian ka lungawi hle. Season tharah hian Real tana ka khelhna hmasa ber ang thoin theihtawp ka chhuah ang," tiin Real-in David de Gea la lut mah se a zam loh thu a sawi.

Casillas hi season tawp lamah ho tak taka goal chhuah a neih avangin Real Madrid ṭantute pawhin an au nawmnah hial.