Di Matteo-a'n Schalke hna a bansan

Chelsea manager hlui Roberto Di Matteo chuan thla sarih leh a chanve chhung German club FC Schalke a enkawl hnuin manager hna aṭangin a bang.

Di Matteo chuan a hna aṭanga a ban chhan chu manager-te nen an thu a inhmuh loh vang nia sawiin, Schalke director of sport Horst Heldt nen an inhmuh zawh hnu lawkah a ban tur thu hi a tichiang a ni.

Kum 2012 Champions League-a Chelsea champion puitu manager chuan, "Kan hmalama kan hlawhtlin theihna tur ruahmanna ka siam te ka kawhhmuh a, mahse ka ruahmanna te hi club lamin an pawm lo. Heta ṭanga lang chiang chu club-in tum dang an nei a, ka tum nen a in ang lo tih hi a ni. Club nen kan tum a in tawh loh chuan ban mai loh chu tih tur dang a awm tawh lo a ni," tiin a ban chhan a sawi.

Kum 44-a upa manager hian October 2014-ah khan Schalke hi a zawm a, a zawm tirh hian table-a 11 ni pha ṭawk kha pathumnaah hial a hlangkai hman.

Mahse, tunhnaiah Schalke-in beisei an phak lo a, an match hnuhnung vawi sawmah vawi hnih chiah hnehna changin table-ah parukna nichungin season an khar.