Europa League khel tur West Ham
Premier League club West Ham an vannei. An khelh ṭhat vang ni loin, an khelh mawi vangin season tharah Europa League an khel dawn.
West Ham hi Premier League Fair Play table-ah pakhatna an ni a, Europa League first qualifying round khel tur team 104 zingah an tel theih phah ta a ni. Europa League group stage tak khel phak tur erawh chuan London club zinkawng hi a thui dawn khawp a, July 2 aṭangin first qualifying round an khel anga, group stage khel tur hian round li na thlenga an chak chhoh a ngai dawn a ni.
The Hammers Joint-chairmen David Sullivan leh David Gold te chuan thuchhuah inṭawm siamin , "July thla tir aṭanga inelna khelh tur awm nghal hian club chhungah chona nasa tak min tuksak dawn a ni. Europe-a inlan theihna chance a nih avangin kan player te pawn nuam ti takin an khel ang tihah kan chiang a ni," an ti.
West Ham hian tuna an khelmual hman mek Boleyn Ground hi hi kum 2016-17 season-ah chuan an insawn san tawh dawn a, Olympic Stadium an luah tawh ang.
Sullivan leh Gold te thuchhuah inṭawm chuan hei hi sawilangin, "Hun rei tak kan lo inkhuar tawhna Boleyn Ground hi a ṭha thei ang bera mangṭha kan duh a, chumi atan chuan Europe-a kan inlan hi a pawimawh em em dawn a ni," tiin Europa League qualifying round-ah an tih mai mai loh tur thu a sawi.
English club zingah Tottenham Hotspur leh Liverpool te chu Europa League-a inhlan tur chiangsa an ni a, FA cup final-a Aston Villa leh Champions League khel tur Arsenal inkhelh huna Villa an tlawm chuan Southampton an khel anga, Villa-in FA Cup an chawi erawh chuan Tim Sherwood-a leh a hote Europa League-ah kan hmu thung ang.
West Ham hian Pathianni khan an manager Sam Allardyce an ban a, amah thlak tura an biak Rafael Benitez chuan Real Madrid a awn hmel zawk avangin an coach thar tur hi ala hriat loh.