Arjuna Award-a vawi 3 hnawl hnu Jeje MFA-in a vui pui; Kiren Rijiju hnenah lehkha an thawn

Mizo infiammi zinga hriat hlawh ber tia chhal ngam Jeje Lalpekhlua chu a vawi thum nan Arjuna Award dawng tura chhawpchhuah ni mah se en kân a ni a; hemi chungchangah hian Mizoram Football Association chuan Union Sports minister Kiren Rijiju hnenah lehkha an thawn. 

Ministry of Youth Affairs and Sports-in an pek chhuah ṭhin chawimawina dawng tur hian All India Football Federation chuan Jeje hi Sandesh Jhingan leh hmeichhe footballer Bala Devi nen an chhawp chhuak a, Jeje hi a vawi thum nana en kan niin ani aia India tana khel tlem zawk Jhingan hi thlan a ni. 

MFA chuan, "Engvangin nge Jeje hi vawi thum ngawt nominee-a telh a ni chunga vawi thum en kân a nih?" tiin Sports Minister hi zawhna an zawt a, Arjuna Award dawng tura tehna sawi fiah turin an ngen bawk. 

MFA honorary secretary Lalnghinglova Hmar chuan, "Jeje-a'n ram tana hna a thawh tawhte thlirin Arjuna chawimawina dawn hi a phu takzetin kan hria a, vawi thum ngawt a hming chhawpchhuah a nih hnu pawha an thlan loh zel chhan hi hriat kan duh a ni," tiin a ziak. 

Kum 2017 khan Jeje-a hming hi Arjuna chawimawina dawng turin chhawpchhuah a lo ni daih tawh a, hemi ṭum hian hmeichhe footballer ropui Oinam Bembem Devi nen AIFF chuan Arjuna Award dawng tur hian a rawt. 

Jeje hian kum 2016 khan a football career-a a mimal kum duhawm ber tia chhal ngam chu hmangin ram tana match ruk a khelhah goal nga a khung a, FPAI Indian Player of the Year leh AIFF Player of the Year-ah thlan kawp a ni. 

Hei mai a ni lo - Federation Cup-ah Mohun Bagan chu champion puiin top scorer a ni a, Best Player atan thlan a ni bawk. Bembem Devi hnathawh ropui mah se Jeje-a kum hman dan enin chawimawina dawn a phu zawk. 

Mahse, Jeje aiah kum 2016 South Asian Games-a India hmeichhe team  champion puitu Manipur footballer Bembem Devi thlan a ni. 

AIFF chuan Jeje chu chawimawina dawn a phu ngeiin a hria a, kum 2019 khan a vawi hnih nan Hnahthial tlangval hming hi Arjuna Award dawng turin an chhawp leh a, India goalkeeper ṭha Gurpreet Singh Sandhu nen a hming hi chhawp a ni. 

GSS hi keeper ṭha tak niin India tan innghahna ni mah se football khawvela an sulhnu thlirin Jeje hi a u en tur a ni a, ram tana sul hnu neih ṭhat dan indawta din tlar tur ni se Punjabi keeper pa sang hian Jeje a ko phak kher lo ang!

Mahse, mak tak maiin Jeje chu a vawi hnih nan hnawl a ni a, a aiah Jeje aia India tana khel tlem daih zawk Gupreet chu Arjuna chawimawina pek a ni. Mizo Sniper hian kum 2018-ah Chennaiyin FC chu Indian Super League nomawi a chawipui mai a ni lo, an innghahna ber niin match 20-ah goal kua a khung a, assist vawi khat a nei. 

Hriat tel tur chu he season-ah hian Chennaiyin hian defensive game ngai pawimawh chungin game an khel a, Jeje-a'n heti zat goal a la khung thei cheu hi uanpui tham a ni. 

Season hmasaah hliam vangin Jeje a inlan miah lo a, heti chung hian AIFF chuan duhsak takin kumina Arjuna Award dawng turin a hming an chhawpchhuak leh - Sandesh Jhingan leh Scottish club Rangers hmeichhe team-a khel mek forward Bala Devi nen an hming hi chhawpchhuah a ni. 

Jeje hi season hmasa a inhliam miau avangin India tana hna a lo thawh ṭhat tawhte en kanin hnawl ni ta se hriatthiam theihna chin a la awm - mahse Jeje aia thlan chhuah Sandesh Jhingan hian season hmasa khan hliam vang bawkin match khelh a nei bik lo!

Jhingan-a'n Indian football-a hming chher beiseia United Sikkim tana bul a ṭan ve lai khan Jeje chuan I League-ah nuam ti takin goal a lo khung ham ham tawh a, Jhingan-a'n ram tan match khat pawh a la khelh loh lai khan India tan match 15 khelin goal riat a khung daih tawh. 

Gurpreet leh Sandesh-a te ram tana an inlan tawh zat belhkhawm hi match 72-a ni a, Jeje-a'n India tan match 56 khelin goal 23-a khung tawh - Mizo striker-in ram tana inlan zat ringawtah player pahnih inlan zat belhkhawm a tluk ṭep tihna a ni. 

Vanglaini chuan MFA-in Kiren Rijiju hnenah lehkha an thawn tih a hriat rualin Jeje Lalpekhlua a be pawp nghal a, Hnahthial tlangval chuan Gurpreet leh Sandesh chu a ṭhian ṭha tak an nih avangin an lakah rilru dik lo a put loh thu a sawi. 

Jeje chuan, "Kei aia Arjuna Award dawng tura an thlante hi ka ṭhiante leh ka inkhelhpui ṭhinte tho an nia, ka lawmpui em em tho. Mahse, eng angin nge he chawimawina dawng tur hi an thlan ka hrethiam lo a, min hnawl chhan pawh hriatthiam a harsa. 

"Kan record leh hlawhtlin tawhnate en chuan ka ṭhiante mah ni se min dawn khalh hi thil mak tak chu a ni," tiin a sawi a, Arjuna dawng tura a lo inbeisei ruk ṭhin thu a pha lo. 

Jeje hian club inelnaah I League (1), Federation Cup (1) leh ISL (2) nomawi a chawi tawh a, ram tan SAFF Championship (3) leh Intercontinental Cup (1)-ah champion nomawi a 

chawi bawk. 

Jeje-a'n club leh ram tana nomawi a chawi tawh zat kan en kan lui duh ṭalh a nih pawhin mimal chawimawina a lo dawn tawh erawh dah hniam chi a ni lo a, Gurpreet leh Jhinghan-ten mimal chawimawina an dawn tawh belhkhawm hi pathum a ni!

Hnathial tlangval-in mimal chawi-mawina a dawn tawh erawh zir tlauh tlauh tham khawpa tam a ni a, Mizo Sniper hian a mimal chawimawina hunna dawhkanah nomawi 10 zet a hung tawh - player pahnih lawmman dawn tawh belhkhawm aiin pasarihin a tam zawk tihna a ni. 

Thil mak danglam tak a awm - Jeje hi India rama footballer intelkhawm pawl FPAI leh Indian football-a thuneitu sang ber AIFF-in Indian footballer ṭha berah an lo thlang ve ve tawh a, ania aia Arjuna dawng tura thlan player pahnih hian an la dawng miah lo thung. 

Jeje hian ram tana goal 23 khung tawhin India tana goal khung tam lamah palina a ni phak a, player la inkhel mek zingah Sunil Chhetri chiah a phak lo - Jeje chungah hian Chhetri bakah IM Vijayan leh Bhaichung Bhutia chiah an awm a, India tan match khata goal 0.41 zel khung ang a ni.