FIFA buaina Eiruk vangin FIFA hruaitu pasarih man

Nimin khan FIFA hruaitu pasarih chu eiruk thubuai vanga man an ni. Man zingah hian FIFA vice-president Jeffrey Webb pawh a tel. Tunhnaiah FIFA hi eiruk thubuai vangin a lo hming­chhe tawh ṭhin hle a, nimina mi pasarih lai man an ni hian FIFA hmai a ti bal lehzual hle ang.

Hetiang boruak hnuai­ah hian Zirtawpnia FIFA president thlan tur chu ruahman sa anga neih tho tum a ni a, Prince Ali bin al-Hussein leh FIFA president ṭanglai Sepp Blatter te an inkhing ang. Prince Ali chuan, "Football tan chuan lungngaih ni a ni," tiin nimin thil thleng hi a sawi a, a bak thil dang a sawi duh lo.

Kum 2018 leh 2022 World Cup chungchangah pawh thil felhlel a awm nia hriat niin chhui chian tura ruahman a ni a, FIFA erawh chuan Russia leh Qatar World Cup thlen turah thil dik lo engmah a awm loh thu an sawi thung.

US Department of Justice chuan thubuai point 47 lai tarchhuakin mi 14 an inhnamhnawih niin an sawi a, inhnamhnawih nia puhte hi thamna sum lak, sum tichingpen leh phone hmanga thamna chungchang buaipuiah puh an ni.

New York attorney general Loretta Lynch chuan, "Kan chhuina leh zirchianna chuan FIFA hnuaiah eirukna hi a tlangnel hle a, thuk takin bu a khuar mek a ni tih min kawhhmuh a ni. FIFA hruaitute hian an nihna zahawm tak chu hmang ṭangkaiin sum leh pai tam tak bawlhhlawh takin an lalut a, an chunga mipui rinna chu a dik lo zawngin an hmang a ni," a ti.

Hetiang boruak duhawm lo takin FIFA a tuam mek lai hian Switzerland lamah FIFA hi 2018 leh 2022 World Cup atana thamna sum laah puh an lo ni ve mek bawk.

Swiss Federal Office of Justice chuan dollar maktaduai 100 chuang FIFA hian 1990's chho a football tournament US leh Latin America-a khelhah commercial deal kaltlanga chingpen chungchangah puhin thubuai an ziak lut bawk.

Court thuchhuak chuan FIFA headquarters Zurich aṭangin thubuai zirchian nan electronic data an khawm tawh thu an sawi a, Swiss Police-te chuan Fifa executive committee member 10 chu thu zawhchian tura an lak tur thu an sawi a ni.

FIFA communications director Walter De Grego­rio chuan, "FIFA tan tuna kan buaina hi a ṭha a ni. Vawiina kan chunga thil thleng hian kawng dik lam zawhin FIFA a pen mek tih a tilang chiang hle," tiin a sawi.

Zirtawpnia FIFA presi­dent inthlan tur atan Swit­zer­land-ah hian ram hrang hrang football hruaitu leh FIFA hruaitute chu an fuankhawm mek a, nimin thil thleng hian tling leh tura mi tam zawkin an beisei Sepp Blatter dinhmun a tih chhiat phah thei hle tura ngaih a ni.