AFC Cup aṭangin Bengaluru an tla

I League champion Bengaluru-in AFC Cup Round of 16-ah South China 2-0 a hneh loin an tla.

Mong Kok Stadium, Hong Kong-ah South China an vannei a, mi­nute 28-naah Daniel McBreen-a penalty hmangin ma an hruai a, Australian forward hian minute 58-naah goal hnihna a khung leh bawk. South China penal­ty hmuhnaa referee thu­tluknaa chu Bengaluru lam tan hriatthiam a har hle.

Bengaluru starting eleven-ah India captain Sunil Chhetri a tel pha lo a, forward pathum hmangin Mizo tlangval Beikhokhei Beingaichho chu Sean Rooney leh Robin Singh te nen an inkawp.

Ṭum dang ang bawk­in keeper-ah Lalthuam­mawia Ralte a awm a, English defender pawi­mawh John Johnson a inhliam avangin Curtis Osano kawppui turin Gurtej Singh chu defence laiah a ding bawk.

Inkhelh ṭan tirhah Robin Singh-a'n Benga­luru tan chance ṭha a hlah nghal a, hemi dawta chance nei hmasa ber chu South China forward Mc Breen a ni. Australian forward hian goal zawna a tauh fuh loh hnuah Mahama Awal penalty hlawhchhuah chu Mc Breen chuan keeper Thuama vennaah a pet lut.

Second half-ah si­phurh sut tumin Benga­luru-in Chettri an luh tir a, Indian club tan Sean Rooney-a'n ṭan aṭanga minute thumna lekah chance a hlah.

Minute 58-naah Che Runqiu ball pass chu McBreen-a'n South China goal hnihna atan a khung a, keeper Thuama tan dan theih a ni lo.

Bengaluru khel ṭha mah se goal an khung thei lo a, goal mamawh zanah Chettri leh a hote an chak theih loh avangin an tlawm.

Bengaluru coach Ashley Westwood chuan, "First half-ah kan khel ṭh a a, team ṭha zawk kan ni. South China khan elpui thamah min ngai lo maithei a, kan bara­khaihah ka ngai. Kha aia result ṭha zawk neih kha kan phu a ni," tiin a sawi.

Bengaluru hian Pa­thianni khian Kanteerva stadium-ah Mohun Ba­gan an mikhual anga, an chak chuan I League nomawi an humhim thei ang.