Benteke hmachhuantu Westwood

Aston Villa midfielder Ashley Westwood chuan Inrinni FA cup final-a an hmachhawn tur Arsenal player te chuan an striker khel ṭha Christian Benteke ngaihtuahin mut mu pawh an tuah ṭhat theih a rin loh thu a sawi.

Kum 25-a upa midfiel­der chuan, "Tu tan pawh Benteke hi chu dan hleih­theih a ni lo. A ṭhat dan berin tunah chuan a khel leh tawh a, defender te nghaisa tu a ni. Ani ang striker hmachhawn hi Arsenal player te'n an chak lo ang," tiin a game hnuhnung 12-a goal 12 khungtu Belgian striker chungchang a sawi.

Kum 24-a upa Benteke hian season ṭan tir lamah hliamin a lo tibuai ve bawk nen beisei a phak lo a, mahse manager Paul Lam­bert ban a nih hnua Tim Sherwood enkawlna hnuaiah a khel ṭha leh tawh hle.

Westwood pawhin hei hi a hmuh hmaih bik lo, "Arsenal player-te hian Benteke vangin mut mu an tuah ṭha thei lo ang tihah hian ka chiang a ni. Ka ngaihdanah chuan Benteke hi a fit leh tawh a, a ṭhat dan berin a khel leh tawh a ni," a ti.

Kum 2012-a Crewe Alexandra aṭanga Villa zawmtu hian Benteke chauh a fak lo, "Kan player neih te hi en ula, champion pui tham an ni. International player hmun tinah kan kawl a, tunhnaiah Fabian Delph leh Tom Cleverley te an khel ṭha em em bawk," tiin Arsenal a sawi ṭhaih nasa hle.

Semi-final-ah Liverpool 2-1 a an hneh ṭuma khel ṭha em em mai kum 19 leka upa Jack Grealish chungchang sawi kaiin Westwood chuan, "Talent danglam bik nei a ni. A theihnaah hian a chiang em em a, a inringtawk em em bawk. Hnehna min chanpui thei tur khawpa player ṭha a ni," a ti.