Nadal leh Djokovic-a'n bul an ṭan ṭha

A vawi sawmna atana cham­pion nomawi chawi leh ngei a tumna kawngah Rafael Nadal chuan French Open first round-ah a khingpui Quentin Halys a hneh. World number 1 Novak Djokovic chuan Jarkko Nieminen hnehin second round a lut bawk.

French Open mipa first round Philippe Chatrier court-a inkhelah hian champion lai Nadal hian harsatna a tawk lem lo a, darkar khat leh minute 50 chhung lekin a khingpui khawtual tlangval kum 18 chauha upa Halys chu 6-3, 6-3, 6-4 in a hneh a ni.

Nadal hi Roland Garros-ah vawi 67 chak tawhin vawi khat chiah chak loh a la nei. French tleirawl Halys tan Grand Slam tournament a khelh hmasak ber a nih avangin tawn hriat ngah tawh Nadal-a laka hnehna chang tur chuan a lahautak deuh niin a lang.

Mipa zinga champion tura rinkai Djokovic chuan a zawna a vawi 23 chak ni hmel hmu turin a khingpui Nieminen chu 6-2, 7-5, 6-2 in a hneh bawk.

Serbian World number 1 Djo­kovic hian harsatna tawk loin set khatna chu la nghal mah se set hnihnaah erawh a tal buai ve teuh hle.

Kum 33 a upa Finland player Nieminen hian 5-2 in hma a hruai hman a, mahse a tawpah erawh a beisei set a hlawhchhuak zo ta chuang lo.

Kum 28-a upa Nadal chuan, "Kuminah beisei anga ka khelh chhuah loh deuh avangin mipuiin ka chungah rinna an nghat ngam lo tih ka hria. Mahse, helai hmun hi ka tan thil thar a ni lo a, ka inkhelh tawh zawng zawnga ṭha ber ni turin khelh chhuah ka tum zel dawn a ni," tiin a sawi.

Inkhel dangah seeded pasarih­na David Ferrer chuan 6-1, 6-3, 6-1 in Lukas Lacko a hneh ve bawk. Ferrer hian tennis a khelh hun chhungin clay court-ah match 300 hnehna a chang tling ta chiah nghe nghe.

Hmeichhe lamah champion tur a rinkai seeded number 1 Serena Williams chuan Andrea Hlavackova chu 6-2, 6-3 in a hneh. Roland Garros-ah hian kum 2002 leh 2013 khan Williams hian champion nomawi a lo chawi tawh a, kuminah hian a vawithum nan chawi leh a inbeisei mek a ni.

Hmeichhe player chak tura rinkai Maria Sharapova leh Williams ten hnehna an chan lai hian seeded parukna Canadian Bouchard chu Kristina Mladenovic lakah 6-4, 6-4 in a tlawm thung.